PWD Kolasib Division-in Bairabi leh Rengtekawn inkar kawng chhia siam mek

0
319
views

Mizoram buhfai mamawh, Bairabi Rail Station atanga motor-a phurh chhuahna, Bairabi leh Rengtekawn inkar kawng chhe lutuk chu PWD (Highway) Chief Engineer hnuaia Kolasib Division-in tunlai hian ngawrh takin a siam mek nia thu dawn a ni a, kawng khuar leh nal lai hnawhna tur lung tam tawk an hmuh theih loh avang erawh chuan duh angin an thawk chak thei lo a ni. ZONET zawhna chhangin PWD hotute chuan Kolasib District-a lung quarry neite chu lung supply tura ngen an ni a, amaherawhchu, an quarry kalkawng that tawk loh avangte, fur laia lung lak a harsat avangtein tun thleng hian mi tlem te chauhin he kawng siam that nan hian lung an la pe thei a ni. Silchar lam atangin Contractor pakhatin lung engemawzat a pe tawh a, vawiin pawh khan truck trip 10 a pe leh a, hengte hmang hian kawng khuar leh a chhe zual laite chu siam rem mek a ni. Puan tawh angin he kawngah hian motor lian, rit phur tan kal a harsat tawh avangin Mizoram Truck Owners Association leh Mizoram Truck Drivers Association chuan tun thla ni 10, Pathianni leh thlenga siam that a nih loh chuan buhfai phur tura kal tawh loh an tum thu an puang a, hemi rual hian kawng siam tha thuai turin kawng enkawltu, PWD chu an ngen bawk a ni. ZONET zawhna chhangin PWD hotute chuan he kawng dinhmun hi tunah chuan tlemin a ziaawm deuh tawh niin an sawi a, vawiin khan buhfai phur, truck ke 12 nei chi pawh 10 chuang a tlan a, maxicab leh sumdawng motor dang, balu phur thlengin thahnem tak a tlan bawk a ni. Highway enkawltu PWD-a thawkte chuan Silchar leh Aizawl inkar kawngpui, National Highway 54-a a chhe zual lai, Bualpui bul leh Kawnpui bula quarry bul chu tunlai hian an siam bawk nia thu dawn a ni.