Mizoram sorkar aiawhte leh HPC (D) hruaitute inbe chhunzawm

0
417
views

Remna zawnga Mizoram sorkar aiawhte leh HPC (D) hruaitute inbiakna chu Aizawla State Guest House Conference Hall-ah vawiin khan boruak \ha tak hnuaiah chhunzawm a ni. He inbiakna hi vawiin chawhma dar 11 khan \an a ni a, tlai dar 4 vel khan chawlhsan lailawk a ni a, sorkar aiawhte chu Additional Secretary (Home), Pu Lalbiakzama’n a hova, Rural Development Deptt. Director, Pu Lalhriatpuia, SP (CID), Pu Rodingliana Chawngthu, Deputy Secretary (Home), Pu Lalthanzuala leh OSD Home, Pu David H. Lalthangliana te an tel a, HPC(D) aiawh mi 6-te chu an Working Chairman, Pu Lalthangliana Hmar-in a hova, mi dangte chu Pu Lal\haliana, Pu Lalthlamuana, Dr. John Pulamte, Pu David Buhril leh Pu Lalmuanpuia te an ni. Sorkar lam a\anga ZONET thu dawn danin, vawiina inbiaknaah hian Frame Work of Agreement lo siam tawh anga Sinlung Hills Council din tur atana Bill duan chu sawiho a ni a, he Draft Bill hi pawl pahnih aiawhte chuan \ha tawkah an ngai a ni. Hemi bakah hian inremna thuthlung, Memorandum of Settlement duan lailawk pawh an thlir tel a, a tlangpuiin \ha tawkah an ngai bawk. Inbiakna hi naktuk chawhma dar 11-ah a hmun ngaiah chhunzawm leh a ni ang a, chutah chuan hmabak la awmte sawiho a ni ang a, chung zingah chuan remna thuthlung siam tur anga HPC(D) hel, nunphung pangngaia lo let turte inbenbelna tura \anpuina leh chhawmdawlna pek dan tur pawh a tel dawn nia thu dawn a ni. Puan tawh angin he inbiaknaah hian tun hma lam a\anga an lo neih tawh, Sinlung Hills Development Council chu Sinlung Hills Council tia a hming thlak remtih a ni a, he Council-ah hian mipui thlan Councillor 12 bakah ruat seat luah tur Councillor 2 dang an awm ang a, Council-ah chuan hruaitu turin Chief Executive Councillor a awm ang a, Chairman, Vice Chairman leh Executive Councillor 4 an awm bawk dawn a ni.