Mizoram sorkar aiawhte leh HPC(D) hruaitute naktukah inbe dawn

0
288
views

Remna kawng zawnga Mizoram sorkar aiawhte leh HPC(D) hruaitute inbiakna ni 2 chhung awh tura ruahman chu naktukah Aizawla State Guest House Conference Hall-ah \an a ni dawn. Sorkar lam a\anga ZONET thu dawn danin, he inbiaknaa Mizoram sorkar aiawhtu turte chu Home Dept.-a Additional Secretary, Pu Lalbiakzama’n a ho ang a, Rural Development Deptt. Director, Pu Lalhriatpuia, SP (CID), Pu Rodingliana Chawngthu, Deputy Secretary Home, Pu Lalthanzuala leh OSD Home, Pu David H. Lalthangliana pawh an tel ang. HPC(D) aiawh tur, mi 6-te chu an Working Chairman, Pu Lalthangliana Hmar-in a ho ang a, Pu Lal\haliana, Pu Lalthlamuana, Dr. John Pulamte, Pu David Buhril leh Pu Lalmuanpuia te pawh an tel dawn a ni. Sorkar lam a\anga thu dawn danin, he inbiakna hi a kal tluan chuan inbiak leh tur chu Political level-a thuneitu sang zawkte inbiakna a ni tawh dawn a ni. Naktuka inbiakna chhunzawm a nih hunah chuan inbiakna hmasaa sorkar lam leh HPC(D) lamin an lo pawm tawh point pasarih awmna, Frame Work of Agreement tihpuitlin dan tur te, HPC(D) hel pawl, nunphung pangngaia lo let tur te chhawmdawlna leh an ham\hatna siamsak dan turte sawiho a ni ang a, heta tan hian sorkar Deptt. hrang hrang, Home, Finance, Law & Judicial Deptt. leh Deptt. dangte ruahmanna siamte thlirhova, pawm tum a ni ang. Puan tawh angin Frame Work of Agreement-ah hian tun hma lama Sinlung Hills Development Council tia hriat \hin chu Sinlung Hills Council tia a hming thlak remtih a ni a, hetah hian thlan tlin Councillor 12 bakah ruat seat luah tur Councillor 2 dang siam a ni ang a, chu Council-ah chuan Chief Executive Councillor, Chairman, Vice Chairman leh Executive Councillor 4 an awm dawn a ni.