Mizoram Sorkar Flagship Programme, SEDP leh National Bamboo Mission hmanga Rua-a intodelh tura hmalaknaah Horticulture Department-in raw chi supply-tu tur a zawng mek.

0
392
views

Hemi atana hriattirna, Short Tender Notice hi tun thla ni 3 khan Horticulture Department hian a tichhuak a, Raw chi Supply tur hi chi hnih – Dendrocalamus Brandisii leh Dendrocalamus Latiflorus a ni a, a chhangtu chuan a lo berah Raw tiak nuai 1 tal a supply thei tur a ni a, Raw tiakte chu Department-in hmun a ruat lawkah an dah thei tur a ni bawk. A chhangtu chuan Dendrocalamus Brandisii leh Dendrocalamus Latiflorus tiak an Supply theihna tur, Rate chiang takin an ziak lang tur a ni a, an Laboratory emaw Nursery emaw hming leh website te, Aizawl-a an Agent emaw an Pisa emaw hming te, Laboratory leh Nursery atanga Dealership an nihna Certificate te, GST Provisional ID te, Experience an neih tawh dan te, Raw chi chu Polypot-a dah a ni em tih te, an Raw chi san zawng leh thil pawimawh dangte an tarlang tur a ni.

Tender hi tun thla ni 16, chhun dar 12 thleng Tuikual South-a Horticulture Directorate Pisa-ah thehluh theih a ni a, hemi ni chawhnu dar 1-ah Technical Bid enfiah a ni ang a, a tuk chawhnu dar 1-ah Financil Bid enfiah leh a ni ang.

Horticulture changtu Chief Minister, Pu Zoramthanga chuan, State Sorkar Flagship Programme, Socio-Economic Development Programme (SEDP) hmanga hmalak turah Rua hmanga intodelh tura tanlak chu an ngaihpawimawh berte zing a mi a ni tih an lo sawi tawh thin a. Rua hmanga hmalakna hian Mizoram mai ni lo, Hmarchhak bial leh ram pumah intodelhna a thlen theih thu te, Mizoramin a buaipui tur Brandisii leh Latiflorus chu tuna Mizorama awm sa ang ni lo, pum lian pui pui, tlawn khat pawh patling 2/3 zawn tham a nih avangin hlawk tham tur anih thu te, Rua hmanga intodelh tura hmalaknaah hian Society anga kal tur anih thu te, chhungkaw tam takin a ruala an chin dawn avangin a sawngbawl pawh a awlsam tur thu te a lo sawi tawh a ni.

He hmalakna bawhzui hian Mizoram Sorkar chuan kumin hian Lengpui-a chhungkaw 126 leh Hmunpui-a chhungkaw 100, an vaiin chhungkaw 226 chu Raw ching tur hian a thlang a, heng mite hmalak dan hi Department-in a enfiah hnuah hmala tha tawk lo chhungkaw 16 paih an ni a, hetihrual hian a tira thlan loh Raw ching duh leh hmala tha chhungkaw 2 thun belh leh niin, Raw ching tura thlan hi chhungkaw 209 an ni ta a ni.

Horticulture Department hotute chuan, heng mite hnena Raw chin tur pe tur hian tender hmanga a tiak Supply thei tur hi zawn mek a ni tih leh, kumin hian Rua hi chin tir hman ngei tum a nih thu an sawi.