Thuchhuah an siamah HPC-D Ex-Volunteer Association chuan, inremnain a rahchhuah Sinlung Hills Council Act chu a hlawtlin ngei theina tura hma laksak turin MNF kaihhruai Mizoram Sorkar thar chu an ngen a, Mizoram sorkar leh HPC-D in inremna an lo siam tawh angin HPC-D lam chuan an tih tur ti tawhin Silai an tung tawh a, Sorkar lam pawhin an tih tur hrang hrangte a rang lama bawhzui an phut tih an sawi.
Puan tawh angin hun engemawchen inremna zawng an inbiak hnuah HPC-D helpawl leh Mizoram sorkar chuan nikum April ni 2 khan inremna thuthlung an ziak a. He inremna ang hian HPC-D mite chuan April ni 13 khan Sesawnga Central Training Institute-ah an rálthuamte an tung a, an silaite chu khatih hunlaia Home Minister, Pu R. Lalzirliana hnenah an hlan a. Inremna thuthlungin a kentel Hmar mipuite tana Sinlung Hills Council (SHC) din tura tih pawh nikum vek July thla khan din ngal niin, Sinlung Hills Council sorkar lailawk a, Chief Executive Member atan Mizoram sorkar leh HPC-D inbiaknaa HPC-D thupuangtu, Pu Lal\halien ruat a ni tih nikum July ni 9 khan Mizoram sorkar-in hriattirna a tichhuak a, Interim sorkar hi thla 6 chhung atana din a ni. Hetih chhung hian SHC huam chin tur leh bial hrang hrangte siamrem tura tih a ni a, hemi atan hian hmalak a nih hmain Mizoram Assembly inthlanpui neih a nih zui avangin hmalak zui hleih theih a ni ta lo a ni.
SHC Interim sorkar term hi tun thla ni 9 khan a tawp tawh a, hemi chungchang thuthar lakhawmtute zawhna chhangin Chief Minister, Pu Zoramthanga chuan, loh theih lohna avangin Interim sorkar term hi pawhsei a ngaih tur thu leh hemi atana hriattirna pawh chhuah thuai tum a nih thu a lo sawi tawh a. Tunah hian Sinlung Hills Council huam chin tur leh bial hrang hrangin a huam chin tur pawh siam rem a la nih loh avangin chak taka hmalak theih a ni lova, sorkar-in a tih theih chinah erawh theihtawp chhuah an tum thu a sawi a ni.
