Mizoram Sorkar leh HPC(D) ten inremna an ziakfel

0
1188
views

Mizoram Sorkar leh HPC(D) ten vawiin tlai khan inremna an ziakfel ta a, kum 20 chuang zet sorkar laka helna chu tihtawp a ni ta a ni.

Inremnaah hian Mizoram Sorkar aiawhin Chief Secretary Pu Arvind Ray a’n hming a ziak a, HPC(D) aiawhin Chairman Pu H Zosangbera’n a hming a ziak ve bawk. Inremna thuthlung hi kum 1994-a HPC nena Memorandum of Settlement lo ziah tawh ang ni lovin, inrin tawnna hmanga siam a ni tih Home Addl Secretary Pu Lalbiakzama’n a sawi a, Inremna ang hian HPC(D) te hian silai chi hrang hrang 48 an tung ang a, heng zingah hian silai \ha AK-47 leh M-16 bakah 9mm pistol te a tel tih a sawi. Inremna neih a nih theihna tur hian inbiakna hmasa lamah HPC(D) ten MLA pathum an lambun \uma an silai man te pawh Mizoram sorkar kutah an lo pe let tawh bawk a ni. Inremna nei tur hian kum 2010 a\ang tawh khan inbiak \an a ni a. Kum 2016 a\ang khan ngawrh leh zuala inbiak chhunzawm a ni a, \um 5 inbiakna neih hnuah inremna hi siam theih a ni ta a ni.

Inremna ziah hmaa thusawitu Chief Minister Political Adviser, Pu Lalrinmawia Ralte chuan inremna a awm theihna tura hmalatu zawng zawngte chungah Mizoram sorkarin lawmthu a sawi a ni a ti a. HPCD Chairman Pu H Zosangbera thuchah pawh HPCD thupuangtu Pu Lalthaliana’n a chhiar chhuak a, HPC(D) in \hangkhat lian zet silai pua hma a lak tawh hnuah mipuite ngen anga sorkar nen inremna neih a ni ta chu lawmawm a tih thu a sawi a, Inremnain a hrin chhuah Sinlung Hills Council lo piang tur chu Hmar mipuite hmasawnna thlentu a nih a beisei thu a sawiin, inremna ziah tak chu inremna tluantling a nih ngei a beisei thu a sawi.
——–

Inremna ziah zawha thuthar lakhawmtute zawhna chhangin Home Dept Addl. Secretary, Pu Lalbiakzama chuan, HPCD rammu te lo lawmna chu tun thla ni 12 khian Sesawng CTI ah neih tum a nih thu a sawi a, inremnain a hrinchhuah Sinlung Hills Council chu mahnia thuneihna nei, Budget pawh a hrang veka nei a nih tur thu a sawi.

Mizoram sorkar leh HPC-D inbiaknaa HPC-D thupuangtu, Pu Lal\halien pawhin he inremna hi remna tluantling a nih a beisei tih a sawi.