Mizoram (containment and Prevention of Covid-19) Ordinance 2020 hi tun thla ni 4 atang khan hman tan a ni a, ni 8 lek chhunga mipuite pawisa tlingkhawm hi cheng nuai 6 leh sang 3400 a tling hman a ni. He danin a sawi angin pawisa chawi tlingkhawm hi District tinah DC te kaltlangin Sorkar sum bawmpuiah chhunluh a ni.
Nimin tuk dar 9 leh tukin dar 9 inkar, darkar 24 chhunga mipui pawisa tlingkhawm chu cheng sing 9 sang 6600 a ni a. Police ten pawisa an chawitir mi 393 leh Local Task Force ten an chawitir mi 171 an vaiin mi 564 an awm a, hemi hun chhunga Police ten an chawitir tlingkhawm hi cheng sing 6 sang 9100 a nih laiin Local Task force te chawitir tlingkhawm chu cheng sing 2 sang 7500 a ni.
Ordinance hmang hian vantlang hmuna hmaituamna vuah lote Rs.100/-, social distancing zawm lote Rs. 200/- leh vantlang hmuna chil chhak te Rs. 300/- chawitira hrem theih an ni a. Covid-19 kaih hnawihah mipuite zawm tur thil dang engmawzat tarlan a ni a, dan bawhchhiatna tarlan zingah Rs.5,000 thlenga inchawitir theihte pawh a awm a ni.
