Mizoram Tipper Owner leh Driver Association-in State dang Tipper Mizorama register leh tlan tir duh loh entirna atana Kolasib-a Tipper an dan kaihhnawiha Kolasib Bawrhsap, Dr. Arun T. leh Cachar Bawrhsap, Pu Laxmanan te inbiakna vawiina Vairengtea neihah vawiin tlai thleng khan thutlukna mumal siam theih a ni lo. He inbiakna hi chhunzawm leh a ni a, an thuchhuak nghah mek a ni. He inbiaknaah hian Kolasib Bawrhsap, Dr. Arun T. chu Kolasib SP, Pu Abishek Dhania leh Officer dangte, Mizoram Tipper Owner leh Driver Association President, Pu C. Lalzarmawia leh OB te bakah Kolasib Sub Hqrs. YMA President, Pu C. Liankunga leh OB dangte an tel a, Cachar District a\angin Bawrhsap, Pu Laxmanan chu SP leh Officer \hahnem takin an \awiawm bawk a ni. An inbiaknaah hian Mizoram Tipper Owner leh Driver Association hruaitute chuan Kolasib DTO Office-ah State dang mite Tipper \hahnem tak register-a Mizoram chhungah tlan tir niin an sawi a, hei hi tihdan tur ni lo leh Mizorama lirtheia eizawngte tan harsatna siamtu niin an sawi a ni. Hemi bakah hian Bagha leh Lailapur vela balu leh brick-a sumdawngte hian Bagha balu cubic meter 1-ah Rs. 800/- zela a leitute hnena pe turin rate an siam a, hetiang hi an rate ding lai a nih laiin Mizoram miten an motor hmanga an lei chuan meter 1-ah Rs. 1,000/- an phut a, brick pawh hnamdangin an phurh chuan man tlawm zawka an pek laiin Mizo driver ten an lei erawh chuan man to zawkin an pe niin an sawi a, hetianga thil tih hi inthliarhranna leh sumdawnna lama inhrekna leh nekchepna nia sawiin, tihtawp an duh thu an sawi bawk a ni.
