Mizorama Covid 19 kai awm chhun Rev. VL Hruaia Khiangte chu ni 47 zet damdawi in-a enkawl a nih hnuah vawiin khan Damdawi in atanga chhuahtir a ni.

0
16
views

Rev. Hruaia hian Covid 19 a kai tih hi March ni 25 khan Health Minister, Dr. R. Lalthangliana’n thuthar lakhawmtute hmaah a puang a. Amah hi March ni 15 khan Netherlands atangin Mizoram lam panin a lo haw a, a tuk ni 16-ah Mizoram a thleng a ni.
Rev. Hruaia hi March ni 18-ah a khua a sik tan a, a reh mai loh avangin ni 20-ah Health Department lam a bia a, March ni 22-ah an chenna inah Doctor-in an tlawh a, a Sample endik tur an lak chu Guwahati-ah thawn nghal a ni. A sample endikna result hi ni 24 zan rei tawh lamah Mizoram sorkar-in a dawng a, Covid 19 a vei tih finfiah hnu hian hemi zan hian a chenpuite nen ZMC-ah dah nghal an ni. Hun rei tak enkawl a nih hnuah a sample endikna atangin Covid 19 hri lak atang hian a fihlim tih finfiah a nih tak avangin, vawiin khan damdawi in atanga chhuah tir a ni ta a ni.

Rev. Hruaia hian a chenpuite pawh natna hi a kai chhawng lova, Mizoram lam pana a lo hawnaa thawlhtheihnaa a chuanpuite pawh endik vek an ni a, tumah natna kai chhawn a nei lo a ni. Rev. Hruaia hi enkawl a nih chhungin natna-in a taksa a lo luah hneh tawh avangin dinhmun ngaihtuahawm takah a ding hman a, enkawl a nih chhung hun tam zawkah khawl hmanga thawk tir a ngai hial a ni. Rev Hruaia hi ni 14 chhung an chenna inah a la inkhung hrang chhunzawm ang a, harsatna dang a nei anih loh chuan ni 14 ral hnuah mithiamten a hriselna dinhmun an enfiah leh dawn a ni.