Mizorama mipui kharkhipna thupek dinglai Pathianni-a tawp tur chu tun thla tawp thleng pawhsei a ni dawn a, inkaihhruaina kimchang chu sorkarin a ti chhuak thuai ang.

0
43
views

Chief Secretary Pu Lalnunmawia Chuaungo hovin, COVID-19 puala Task Group hrang hrang sorkarin a din te chu vawiin khan Aizawlah an thukhawm a, inkharkhip thawh 4-na, May ni 18 atanga ni 31 thlenga neih turah, inkaihhruai dan tur an thlir ho a, hei hi sorkar chuan mipui hriatah a la puangzar dawn a ni.

Hri leng kaihhnawih, thil pawimawh chi hrang hrang an sawiho zingah PMGKY hnuaia Insurance in hri leng dona kawnga a hmatawnga awmte a tuam ve theih dan tur ruahman an rel a, police, VLTF/LLTF leh volunteers te bakah Hospital leh Quarantine Centre hrang hrnga bawlhhlawh la khawmtu leh paihtute bakah a phurtute pawh insurance hi tuamtel tir dan ruahman ni se an ti a, sorkarin hnathawk tura a chhawrten an hnathawhna hmuna an duty laia COVID-19 an lo kai palh a niha insurance cover tir dan tur ruahman tha an ti bawk a, a bawhzui turin Task Group on Insurance chu ruat an ni.

Rapid Antibody Test chungchang pawh an sawiho a, hmun danga tangkhang, lo haw tur an pun belh zel dawna a lan avangin screening point-a medical duty dah belh an rel a, quarantine facility atanga mahni in lama inkhung hrang tur, home quarantine tura chhuah phalsakte chu an chhuah hma in RAT tihsak tur an ni a. Quarantine facility lut lova home quarantine-a lut nghal turte chu screening point ah RAT an negative a ngai a, DC leh an chenna Local/Village Level Task Force te remtihna lak a ngai bawk a ni.

Aizawl khawpui chhunga kohhran hrang hrang 51 in an hmunhmate Quarantine Facility atan hman an remti tih Chief Secretary hova thutkhawmnaah hian sawi a ni a, Jharkhand-a haw tur hnamdang 81 chu Mizoram atanga thawn chhuah an nih thu sawi chhuah a ni bawk.