Mizorama pawn lama hnathawka awm leh zirlai tangkhang, hlawm lian thama lo haw thleng hmasa ber, Chennai atanga rel-a lo haw mi 900 dawn te chuan vawiin khan Bairabi Rel Station tluang takin an lo thleng.

0
28
views

Tamil Nadu leh Pondicherry-a mizo tangkhang, Bairabi lo thlengte hi mi 884 an ni a, Kolasib bawrhsap Dr H Lalthlangliana hovin, Medical team, Liasion Officer leh Police venhimna tha tak nen Bairabi Rel Station ah lo hmuah thlen an ni a. Aizawl district mi 346, Lunglei 50, Champhai 69, Serchhip 34, Kolasib 44, Siaha 136, Lawngtlai 46, Mamit 82, Saitual 37, Khawzawl 20 leh Hnahthial district mi 20 te an ni a, an awmna District-ah theuh ni 14 chhung an in khung hrang vek dawn a ni.

Rail atanga an chhuk rualin uluk takin Medical team ten Screening an neihtir vek a, an chuanna tur Bus-ah luhtir nghal zel an ni a, Bairabi rel station hi khaw chhung lut lovin, by-pass kawng atangin an chhuahsan a ni. Hri inkai darh tamna hmun, Hot Zone-a puan hmun atanga lo chhuak, mi 54 te chu Rel Station ah hian Rapid Antibody Test hmanga endik nghal an ni a, an vaiin an Negative vek a ni.

District hlat dan a zirin Screening hi tih a ni a, chutiang zel chuan Bus pawh chhuah tir a ni. Siaha pan turte chuanna Bus a chhuak hmasa ber a, Kolasib district chuanna Bus chu a chhuak hnuhnung ber a ni.

Bairabi khaw pawn, Meidum thlen hma ah, Mizorama lo haw tharte tan hian ei leh in inpekna tur hmun ruahman a ni a, chaw an eina hmanrua leh ningnawite dahkhawl a paihna tur pawh felfai taka ruahman a, anmahni awmna district an panna kawngah hian tihkhawtlai an nih loh nan, vawiin chawhma dar 9 atang a tlai dar 4 thleng khan Zero point, Saihapui peng leh Bairabi inkarah lirthei tlan khapna thupek District Magistrate in a ti chhuak a ni.
Mizo tangkhang lo haw te hi an lo lawm a ni tih lantirna thuziak chi hrang hrang, Kolasib DC Office leh Village Level Task Force te chuan an tar a ni.

Vawiina Bairabi Rel Station-a lo thlengte hi Thawhleh zan khan Chennai atangin an rawn chhuak a, ni 3 leh zan thum Rel-ah an rawn chuang a, Mizo hlanga Rel-a chuang an ni a, an dinhmun nena inhmeh tak, ‘Hmanlai Farawa-a bawihte kha Pathianin a hruai chhuak’ tih hla an sak chu social media lamah a lar hle a ni.
(Bite Rel a zai)

Bairabi thlenga rel-a an lo thlen theihna tur hian Chennai Mizo Welfare Association-in an buaipui a, rail chuan man hi Tamil Nadu sawrkarin a tum sak vek a ni.