RTI hmanga Zonet zawhna Agriculture Department-in a chhan danin, Fall Armyworm puang hian Vaimim hmun Hectare 3,409-a zau a khawih a, hei hi hmanraw chi hrang hrang leh rannung thahna hlo Pesticide hmanga dolet ngal a ni a, chhiatna nasa lutuk a thlen hmaa hmalak nghal a nih avangin Vaimim seng tlak loh khawpa a tihchhiat chu Hectare 37.70 vel chauh a, Vaimim a tihchhiat zawng zawng hi Rs. nuai 11 leh sing 8 chuang hu vel nia chhut a ni.
FAW vanga harsatna tawk hi Lunglei District-ah tam berin chhungkaw 3,689-in harsatna an tawk a, Champhai-ah chhungkaw 1,440, Serchhip-ah 1,403, Mamit-ah 1,198, Kolasib-ah 873, Lawngtlai-ah 604, Aizawl-ah 585 leh Siaha District-ah chhungkaw 388-in harsatna an tawk a ni.
FAW puang dolet tur hian Sorkar-in kawng hrang hrangin hma ala a, Agriculture Secretary kaihhruaina hnuaiah State Level Sub-Committee on Incidence of Fall Armyworm din a nih bakah State Level Rapid Response Team on Fall Armyworm din nghal a ni a, Chanchinbu leh TV hmangin FAW chungchang leh a dolet dan tur inzirtirna tihchhuah niin, he rannung thahna hlo leh hmanruate loneitute hnenah pek a ni a, Agriculture Department-a thawktute chu a hmunah kalin Pesticide hman dan an zirtir a, Indian Council of Agriculture Research, Indian Institute of Maize Resrach leh National Bureau of Agriculture Insect Resorces nen tang hovin Aizawlah FAW chungchang zir hona leh inrawn khawmna buatsaih a ni a, Agricultre Minister-in Central YMA a ngen angin Branch hrang hrangah FAW thlahtu Phengphehlep suat nan zanah meipui chheh a ni a, heng hmalakna hrang hrang hi a hlawhtling hle a, FAW-in a khawih Vaimim kung tam tak chu insiam \ha lehin, rah a chhuah leh a, a tira hlauhthawn aiin chhiatna hi a thleng nep a ni.
Agriculture Department chuan, FAW hi a lan tawhnaah chuan tirem turin kum 3 vel tal a ngaih thu an sawi a. FAW hi Mizoram a\anga reh hlen tura do hneh theih beisei niin, chutiang tur chuan hma an la mek a ni. Kumin hian FAW puang vangin Mizorama Vaimim thar a tlem phah deuh nia hriat a ni a, nikuma Mizoram-in Vaimim a thar chhuah chu Metric Tonne 10,567 a ni a, kuminah hian Metric Tonne 8,736 thar beisei a ni.
