Ram chhung hmun dang rualin Mizoramah pawh vawiin khan Zirtirtute ni hman a ni a, Mizorama zirna in hrang hrangten an mahni remchan angin an hmang. He ni pual hian programme hrang hrang an buatsaih hlawm a, zirlaiten an zirtirtute duhsakna leh chawimawina thilpekte an hlan bakah thiam thil chi hrang hrang an entir a ni. MZP General Headquarters chuan zirtirtute chu duhsakna an hlan a, ram leh hnam tana an pawimawhzia hriaa rinawm leh fel taka an hna zahawm tak chu thawk tura an ngen bakah zirtirtute chu khawtlangah hmun pawimawh tak changtu zinga mi an nih avangin anmahni zah thiam turin mi tin an ngen bawk. MSU General Headquarters President, Pu RB Lalmalsawma pawhin Bawngkawna Heal Net Academy Teachers Day lawmna inkhawm hmanpuiin, zirtirtute chu nun kaihruaitu pawimawh tak an nih avangin zah an phu a ni, a ti a, zirtirtute chu ram leh hnam din chhuahna atana mi tangkai an nih avangin an zirlaite rilru-a ram leh hnam hmangaihna tuh turin a chah bawk. He ni hi sikul hrang hrangah hman a ni.
