Mizorama Zirna In te chu thla thar, July ni 15 atanga hawn tan tum a ni a, pawl 8 chin hnuailamte school luh hun tur chu School Education Dept in a la ngaihtuah ang.

0
184
views

School Education Minister Pu Lalchhandama Ralte hova HRD hnuaia Department hrang hrang, Central YMA, MZP, MSU, Federation of Mizoram Governmemnt School Teachers leh MISA hruaitute vawiina thukhawm chuan kum kallai, 2020-21 School Academic Session tan hun atan July ni 15 hi an ruat a ni.

Zirna In hawn tan hma hian Zirna In hrang hrang, quarantine-na atana hmante chu tihthianghlim hman beisei anih thu leh hri leng vangin tum ang hunah zirna In hawn theih ni lo mahse, Academic session zawh hun pangngai nakkum March thlaah zawh hman tura ruahman anih thu thutkhawmnaah hian sawilan a ni a, school calender thar pawh duan that leh nise, hetihlai hian boruak tawn a zirin class hniam lam naupang te zawk te luh hun tur erawh chu ngaihtuah that leh nise an ti a, a hunah zirna in hawn theih ni lo mahse elementary te tan sessional work plan siam a nih thu leh, zir chhuah tur awm sa vek anih thu te, zirlai paih then ngai lova kalpui theih beisei a nih thu te pawh sawilan a ni a, Secondary zirtur chin pawh ruahman chhin a nih tawh thu pawh sawilan a ni.

Higher Secondary erawh chu NEET leh JEE exam hmachhawn leh tur annih avangin CBSE kal dan enin ruahmanna siam leh nise an ti a. Hei bakah tunthla ni 22 atangin pawl 11 admission hawn an rel a, Pawl 12 subject thenkhat exam zawh loh, exam leh hun tura ruat, tun thla ni 16, 17 leh 18 chu kaltlangpui an rel a, Exam center tinah thermal screening tih a ni ang a, July ni 15 hmain HSSLC result tih chhuah hman tum a ni ang.

Thutkhawmna kaihruaitu Education Minister Pu Lalchhandama Ralte chuan, hri leng vangin zirna in te a hunah tan theih ni lo mahse, zirlaiten an tawrh loh na turin sorkarin a theih angin hma a la a ni a ti. Thutkhawmnaah hian HRD Board Vice Chairman Pu L. Thangmawia, Education Secretary Pi Esther Lalruatkimi leh zirna lam kaihhnawiha mi pawimawh dangte an tel a ni.