Mizoramah Covid 19 hri kai 29 hmuh belh an ni a, hei hi ni khat thil thua Mizorama hri kai hmuh tam ber pahnih-na a ni.

0
50
views

Hri kai hmuh thar zinga 24 chu ZMC-a sample endik a ni a, a dang 5 chu Lunglei Civil Hospital-a hmuh an ni. ZMC-ah hian nimin khan sample 295 endik atangin hri kai 24 hmuh chhuah an ni a, hri kai hmuh thar zing 21 chu mipa leh a dang 3 chu hmeichhia an ni a, an zingah hian naupang kum 3 leh kum 13 tih loh midang zawng chu puitling kum 18 atanga 64 inkar an ni.
ZMC-a hri kai hmuh zinga 14 chu Aizawl District-a awm hnam dang, sipai vek an ni a. Lawngtlai District mi 9 leh Mamit District mi 1-an awm bawk. Hri kai hmuh thar zinga 2 chu hri kai nen an inhnimhnaihna atanga kai an ni a, a bak zawng chu State pawn atanga lo haw an ni.

Nimin vek khan Lunglei Civil Hospital-ah sample 29 endik atangin hri kai hmuh thar 5 an awm a, heng mite hi BSF sipai, Vanhne Camp-a awm lai vek an ni a. An vai hian Mipa, kum 30 atanga 58 inkar, hri kai lan chhuah dan nei lo vek an ni a, hri kai tawhte nen an inhnimhnaihna atanga kai an ni.

Nimina hri kai 29 hmuh belhte nen hian Mizorama hri kai zat chu 267 an tling ta a. Hetihlai hian ZMC-a hri kai enkawl lai hmeichhe pakhat chu a dam tawh avangin vawiin khan damdawi in atanga chhuah tir a ni a, heti hian hri kai hmuh tawh 267 zinga 160 enkawl dam an ni tawh a. Hri kai tawh zawng zawng atanga enkawl dam hi zaa 59.92 a ni.

Tunah hian hri kai enkawl lai 107 an awm mek a, Mizorama hri kai zingah thi an la awm lo a ni.

Zonet zawhna chhangin ZMC hotute chuan, tun hi ni khat thil thua Mizorama hri kai hmuh chhuah tam ber tum 2-na a ni tih an sawi a, a tam ber tum June ni 9 khan hri kai 46 hmuh chhuah an ni.