Vawiina an party office Hnam Run inkhawmah thu sawiin Pu R Tlanghmingthanga chuan, Loterry Distributor-te hun sorkarin a pawhsei chu suspend mai ni lovin cancel nghal turin an party chuan a phut tih a sawi a, sorkar chu Tender maksak tak, anmahni duhsak bikte chauhin an chhan theih tura siamah puhin, a thara Tender chhuah an phut tih a sawi. Pu R Tlanghmingthanga chuan, MNF in thuneihna a chan laia Lottery a kalpui danah thil fel lo a awm a nih chuan CBI emaw, a aia lian eng pawh chhui tir an cho tih a sawi a, CM Pu Lal Thanhawla hnenah pawh MNF hunlai atanga chhui tura an inhuam thu an sawi hnuah pawh tun thlengin chhuitir a la ni lo tih a sawi a, CM chuan chhui tir a ngam tak tak lo nia an hriat thu sawiin tun hnaia MNF hun laia Lottery kalpui danah thil dik lo awm ve anga an sawi thar leh chu thu dik lo, phuahchawp mai a ni a ti.
Pu R Tlanghmingthanga chuan Congress thil tih sual an sawi chhuah apiangin Congress party chuan MNF inpumkhatna tih chhiat tumin hmanrua an zawng ve vat thin niin a sawi a, an party hruaitute inpumkhatna sut keh chu an tum lian ber a nih thu a sawi a, an thil tum chu an hlawhtling thei dawn lo tih sawiin MNF Elected OB-te chu an taksa a hrangin awm mahse, an lungrual a, an inkarah sarang pàn ber chi pawh a leng lo niin a sawi. Inkhawm hi an pawl General Secretary Pu Lalruatkima MLA in a kairhuai a ni.
