Vawiina Aizawl Press Cluba chanchinbumite a kawmnaah Pu Lalhmingliana chuan an party president Pu Zoramthanga dinna Aizawl East-I biala |angrual pawl ZPM aiawha ding, Pu K Sapdanga chu beiin, amah hi Zonet Cable TV neitu zing ami a ni tih sawiin, chhiah tam tak awlruah a puh a, subscriber an neih zat Sorkara an report chu a dik thei lo nia sawiin, RTI hmanga an dil chhuah a\anga a lan danin Taxation Dept. Aizawl south Zone-a report an thehluh danin kum 2014 a\anga 2017 thlengin Zonet TV pawttu chu mi 3138 an ni ngar ngar niin a sawi a, kum 4 chhunga Aizawl khawpui chhim lama Zonet pawttu thar emaw pawt ta lo emaw pakhatmah an awm lo chu thil mak a ni a ti a, Pu K Sapdanga chu mipui sum bawma lut tur eiruah puhin sorkar budget enkawltu MLA ni tlakah MNF chuan a ngai lo a ni a ti. Chanchinbumite zawhna chhangin Pu Lalhmingliana chuan Cable TV dangte’n subscriber an neih zat sorkara report an thehluh dan erawh RTI hmanga an dil zingah a tel loh avangin an sawi thei lo tih a sawi.
ZPM in Chief minister atana an zawrh Pu Lalduhawma pawh beiin, ‘Enchhin loh awm chhun hi min enchhin ve teh u’ tih bak Campaign au hla mumal a nei lo niin a sawi a, Pu Lalduhoma chu Zoramin kum 10 chhung MLA ah leh MP atan kum 1 an lo enchhin tawh tih sawiin, mizo mipuiten an en chhin chhunga a thil tih langsar zualte chu a zin hauh lohna hmuna zin anga in sawia dawt bill siama sorkar sum tam tak lak chhuah leh amah MLA-a thlang tlingtu khaw pakhat tui tlan ruk \hen saka a huana lo lak pen te a ni a ti.
Pu Lalhmingliana chuan Congress Sorkar pawh na taka beiin, nikum a khuarel chhiatna tuar te chhawmdawlna tur Sorkar laipuiin cheng nuai 3597 Mizoram Sorkar a rawn pek chu Congress sorkarin a ti chingpen niin a sawi a. nikum May leh July thla chhova ruah sur nasa in Mizoramah chhiatna nasa tak a thlen avangin in leh lo chan leh mihring leh ran engemaw zat an thi tih a sawi a, he chhiatna tuartute chhawmdawlna tur hian Sorkar laipuiah Mizoram sorkar in cheng nuai 7144.678 leh mipui chhiat tawk te chhawmdawlna turin cheng nuai 4389.1 an dil a, sorkar laipuiin cheng nuai 3597 a rawn pe ta niin a sawi. Pu Lalhmingliana chuan, State Sorkarin vanduaina tawktute hnena sum tlem te te an pek bak pek chhunzawm a awm awm an hriat zui loh thu sawiin, chhiat tawk te tanpuina tura sorkar laipuiin sum tam tak a rawn pek chu khawiah nge a awm tih Congress sorkar a zawt a, mipui chhiat tawkte tanpuina tur sum lo tihchingpen duhna an nei chu a vanduaithlak hle a ni a ti bawk.
Heng bakah hian Lottery sum bo nia sawi te, Zo Carbon hmanga eirukna nia sawi te, Pu Lalthanzara company, Sunshine Overseas Pvt Ltd hmanga sorkar sum tih chingpen nia sawi te, Chief Minister Pu Lal Thanhawla’n Kolkata-ah in ropui tak a nei nia sawi te, Zirna in lem nia sawi, NIAS-a zirlai tirh chungchang te, SIPMIU hnuaia Ek In man to leh Motor man to uchuak taka lei nia sawi chungchang te pawh Pu Lalhmingliana hian sawilangin, Congress party chu mizo mipuiten an hnawl a ngai niin a sawi.
