MPCC President Lal Thanhawla’n Assembly inthlanpuia an chak loh chungchangah puhmawh tur zawng lo tura congress party mite chahin ‘Ni tha lo atan Pathianin roreltu tur a ruat ve \hin tho a, chuvangin kan tana hun ruat hi kan pawm mai tur a ni’ a ti.

Kumin atana Congress Party Office, Bhavan hawnna inkhawm-ah thu sawiin, Pu Lal Thanhawla chuan, Assembly inthlanpuia Congress party tlak chungchangah tumah dem lo turin party mite a chah a, Mizorama ringtuten Kohhran an zah loh chuan zah tur dang an nei tawh lo tih sawiin, Kohhran lu chu Krista a nih avangin Kohhran hnathawh leh a rorelte Congress party chuan an pawm thiam tur a ni a ti a, Kohhran dodal zawngin Congress Party miten tawngkam an hmang tur a ni lo, a ti bawk.

Kum 10 Congress-in ro a rel chhungin sorkar thar tana buaipui tur kihhnawk an hnutchhiah ve lo niin Pu Lal Thanhawla chuan a sawi a, Lok Sabha inthlanpui neih tura Congress thawhpui duhtu party rampumah an pung zel nia sawiin India ram politics insingsa mek thlirin, Congress party mite chu phur taka party tana thawk tur an ni a ti. Congress Bhavan hawnna inkhawm-ah hian MLA Pu Zodintluange leh Pu C. Nunglianchunga te bakah Party hruaitu dang ten thu an sawi a. Inkhawm hi MPCC Treasurer Pu H. Liansailova’n a kaihruai a ni.