Vendor leh warehouse neitute hian an hmalak tum dan hi chanchinbumite hrilhin, Sorkar in zu zawrh tur an lak khawlsa tihralna hun pe loa dry day a puang rei lutuk chu thil kalphung ni lova an hriat thu an sawi a. Chief Minister Pu Zoramthanga leh Excise Minister Dr. K. Beichhua te an hmuh hnuah pawh awmzia a neih theih tak loh avangin Court kal lo thei lo dinhmunah an ding ta niin an sawi.
MLPC dan a la tawp loh avang leh, chhiah pek vek hnua tihfel sa zu truck phur 100 chuang Mizorama lut tur a la awm bawk avang te in an dawr te tihtawp nghatl thut theih a ni lo niin Vendour leh Warehouse neitute hian an sawi a. Dry day puan chhungin dawr luah man te, hnathawktu chhawrna leh electric bill thlengin an la chawi reng tih sawiin, sorkar hmalakna mumal loh avangin nitin sum an hloh niin an sawi a, tuna zu zawrh tur khawlkhawm sa te chu chhiah pek vek tawhna anih avangin hralhna hun sorkarin a siamsak loh chuan sum tam tak an hloh dawn tih an sawi.
Zonet thudawn danin Warehouse pathum Raphael Warehouse, SS Enterprice leh RTP Warehouse te bakah Vendor lam atangin, a mal theuhin tunkar hian Gauhati High Court, Aizawl Bench-ah dry day titawp tura ngenna hi an thehlut dawn a ni.
