MPCC Treasurer Pu Zodintluanga’n, ram hruaitu lu berin sum hlir a sawi avangin mipui tan a him tawh lo niin a sawi.

0
335
views

Vawiina Lunglei District Congress Committee in Lunglei Congress Bhavan-a Conference leh Party hruaitu thlanna an neih a hmanpui naah sawiin, Pu Zodintluanga chuan, pawisa harsatna avangin Mizoram a rum mek niin a sawi a, hetihlai hian ram hruaitu lu ber chuan sum tam thu leh a awlsam tur thu hlir a sawi a ni a ti a, hei hian mipui rilru a tihchhiat a hlauhawm a ni, a ti a, chhungkaw pa berin pawisa ringawt a atchilh a, pawisa atchilh tura a fate a fuih reng chuan sum bawihah an lut dawn a, chutiang chiah chuan Mizoram hruaitu lu berin sum ringawt a sawi chuan mipuite hnathawk lova sum ringawt buaipuinaah a hruailut ang tih a hlauhawm hle ani, a ti.

Pu Zodintluanga hian MNF sorkar chu State pawn hnamdang miin an hlau lo hle nia sawiin, tun thla ni 7, khan India rama Hindu lal ram din tumtu pawl RSS mi leh sa 140 laiin CM Bunglow kawtah pungkhawmin lungawi lohna an lantir a, Vande- Mataram tih leh Bharat Mataki- Jay ti te inn an rual ngam a ni a ti a. Khatiang kha Mizorama la thleng ngai lo a ni a ti.

LDCC Conference leh Inthlanah hian LDCC President atan Pu C. Lalhmingliana, Vice President Lalchhawnzauva leh Treasurer R. Lalnunthara te chuhtu an awm lo in an tling a. LDCC Executive atan mi 30 thlanchhuah turah mipa 50 leh hmeichhia 4-in nomination an file a ni.