MSSA General Conference vawi 13-na hmang

0
357
views

Mizoram Secretariat Service Association (MSSA) chuan vawiin khan Synod Conference Centre-ah General Conference vawi 13-na an hmang a, UD&PA Minister Pu Zodintluanga’n a hmanpui. UD&PA Minister chuan thu sawiin sorkar hnathawkte chu department hrang hrangah hna inang lo tak tak an thawk a, an vaiin mipui leh ram tana thawk an ni a, sorkarin hlawh tha tak a pek nachhan hrerengin an eizawnna hna chu chhiat ni leh that ni zawng zawnga tel kim vek tuma kal paha thawh chi a ni lo, a ti a. Company lian tak tak awm ve lohna Mizoramah sorkar hna hi hna tha leh hlu, mi te thawh chak a ni a, hetiang thawk theia kan awm hi kan vanneihzia hria-in theih tawp chhuah hi kan tihmakmawh leh kan hna-in min phut tlat a ni, a ti. Minister chuan MSSA-te chu sorkar inrelbawlna kawngah a kila lung pawimawh, sorkar dan hrang hrang zam leh ken kawh thu-ah te, service rules chungchangah te dinhmun pawimawh tak chelhtu an nih avangin sorkar hotute an finchhuahna kawngah thu lai la taka an thiamna leh hriatna hmang tura fuihin mahni tanghma hai chunga hna an thawh chuan khua rei-ah ramin a la tuar dawn, a ti bawk.
MSSA Conference chawhma inkhawm hi an President Pi K.Vanlalrawni’n a kaihruai a. Chawhnu lamah Vice President Pu Lalringa Sailo-in kaihruaiin hruaitu thar thlanna an nei bakah, member tharte leh kaisangte lawmna an nei bawk a ni.