Myanmar Sipaite leh Arakan Army te innghirnghona avangin Lawngtlai District-a mipuite ralti

0
594
views

Lawngtlai District Myanmar ramri depa Myanmar Sipaite leh Arakan Army te innghirnghona avangin, helai biala mipuite an ralti hle a, Lawngtlai District-a Kawnkhaw nu, fa 4 nei, Pi Khusoma, kum 37 mi chu Myanmar ramri depa rahpuah bomb, land mine a rah puah avangin nimin chawhma khan a hliam tuàr lovin a thi.

Lawngtlaia ZONET Corr. hnen atanga thudawn danin Pi Khusoma hi Nbauh Krauhha nupui a ni a, Ningani zing dar 8 vel khan lo-a hmarcha lo tura a kal chuan kawnga rahpuah bomb phum ruk a rap puak a, a kawnga chin hnuai lam zawng bomb hian a thlawh darh vek a, a hliam tuàr lovin nimin zing khan a thi zui ta a ni. Kawnkhua hi Parva leh Tuisentlang inkar, Myanmar ramri bula awm a ni a, helai velah hian tunhnaiah Myanmar Sipaite leh Arakan Army te inkarah inkahna a thlen fo avangin rahpuah bomb phumrutute hi Myanmar Sipai nge, hel pawl tih a hriat loh a, helai bial hi a ralmuang ta lo hle niin ramria chengte chuan an ngai a ni. Puan tawh angin nikum November ni 25 khan Tuichawngtlang khaw mi, Robichondro, kum 20 mi chuan silaimu tawng palhin na takin a lo hliam tawh a, tun thla ni 12 khan Sabualtlang khaw mi, Monodo, kum 67 mi chu Myanmar Sipaiten Hel emaw tiin na takin an kap hliam a, tun kar Thawhtanni, Januarny ni 15 pawh khan Burdukbanga khua, Jitua Tongchongya, kum 26 mi chu rahpuah bomb, land mine rah puah vangin a ke veilam kephah bawr bomb-in a thlawh darh vek a, tunah hian Lunglei damdawi inah enkawl mek a ni a, a ke veilam chu tan sak a ni. Lawngtlai District-a Myanmar ramri dep khaw hrang hranga awmte hian an khaw ram chhung chu chilpuah bomb phum ruk vangin a ralmuang lo hle-ah an ngai tawh niin Lawngtlaia kan Corr. chuan a sawi a, mi tam tak chu an eizawnna ber lo lamah pawh an kal ngam tawh lova, Mizoram sorkar leh sorkar laipui te chu rahpuah bomb, land mine phum ruk zawng chhuak vat turin an ngen a ni.