Zemabawka Tertiary Cancer Care Center leh The Regional Institute of Paramedical and Nursing Sciences building thar Union Minister for Health & Family Welfare, Pu JP Nadha-a’n hawng

0
457
views

Zan khat riaka Mizorama lo zin mek, Union Minister for Health & Family Welfare, Pu JP Nadha chuan vawiin chawhnu khan Zemabawka Tertiary Cancer Care Center leh The Regional Institute of Paramedical and Nursing Sciences (RIPANS)-ah building thar 4 a hawng. RIPANS-a a thil hawn te hi Boys Hostel, Girls Hostel, Library leh Examination Hall-te a ni. Hengte hi naktuka hawn tura ruahman nimahsela, naktuk hi Pathianni a nih avangin vawiin chawhnu khan a hawng ta a ni. Pu JP Nadha hian vawiin chawhnua Lengpui tumpui atanga Aizawl a lo thlen hnuah RIPANS Governing Board Meeting RIPANS hmunah a neihpui a, hetah hian Health Minister, Pu Lal Thanzara leh Health Deptt. enkawltu Senior Officer te leh RIPANS Director leh Officer te an tel a ni. Vawiina Lengpui tumhmun a lo thlenin Pu JP Nadha hi Health Minister, Pu Lal Thanzara, Health Secretary, Pu Lalrinliana Fanai leh Senior Officer dangten an lo dawngsawng a ni. Pu JP Nadha hi zanin hian Aizawlah a riak ang a, Health Minister, Pu Lal Thanzara’n Hotel Floria-ah zanriah, Mizo hnamlam entirna ni bawk a buatsaih sak dawn a, naktuk, Pathianniah Aizawl chhuahsanin a haw leh dawn a ni.