Sorkar hna, Group B non gazetted post chin lak hna sorkarin MPSC mawhphurhna a\anga a laksak hnu-ah MPSC in interview buatsaih tura ruahmanna a lo siam tawh nimina a cancel chuan sawizui a hlawh hle a, MPSC hian an thuneihna chin sorkarin a siamremna Gazette chu june ni 21-a tih chhuah a nih tawh avangin personal interview neih tura lo ruahman tawh, Home Dept hnuaia UDC hna te, AH&Vety hnuaia Computer Operator hna te leh Health Dept hnuaia Staff Nurse hna te chu MPSC lak tur a nih tak loh avangin interview tura ruahmanna a lo siam tawhte chu \hulh a ni tih nimin khan a puang a. Hei bakah hian Group B chin hnuai lam hna la tura hmalakna kallai leh limited departmental examination buatsaih tura hmalakna kallai te pawh tihtawp a nih thu MPSC hian a puang bawk a ni.
MZP chuan hemi chungchangah hian vawiin khan Chief Minister Pu Zoramthanga hmuin MPSC-in hnalak tura hmachhawp leh interview tur te kal tlangpui chu an duhdan anih thu an thlen a, Chief Minister hian MPSC hnuaia hnalak kal mek tih tawp a ni chu Sorkar anga an hriat loh thu a lo hrilh tih MZP chuan an sawi a, hetihrual hian ‘MPSC hnuaia hnalak kal mek leh hnalak tur advertisement tih chhuah tawhte chu MPSC in a lak chhunzawm theih nan hma a lak nghal tur thu MZP hruaitute hi a lo hrilh a ni.
MZP hruaitute hian MPSC chairman Rev. Zosangliana Colney pawh a office ah an kawm a, MPSC Chairman hian Sorkarin June ni 21-a Gazette a tih chhuah angin Group B non gazetted chin lak hna chu MPSC kuta dah anih tawh loh avang leh sorkar a\anga thupek dang dawn an neih loh avanga cancel an nih thu MZP hruaitute hi a lo hrilh a, Mizoram Sorkarin Notification te siam\ha a, MPSC hnalak kal lai te chhunzawm tura a ti anih chuan MPSC in harsatna a nei lo a, an chhunzawm leh nghal mai dawn tih a lo hrilh a ni.
