MZU Vice Chancellor nghet neih phut vangin hnathawkte pisa kai tur dang

0
452
views

Mizoram University Students Council bul tumin tukin dar 8:30 atang khan Vice Chancellor nghet neih phutin tiam chin awm lovin MZU-a thawktute pisa kai tur dan an ni. Zonet zawhna chhangin MZUSC hruaitute chuan Vice Chancellor nghet an neih hma chuan zing dar 8:30 atanga tlai dar 5:00 inkar-a MZU-a lut leh chhuak tur zawng zawng chu dan vek an tum thu an sawi a. Tukin dar 8:30 atang khan MZU main gate bulah duty tanin, MZU-a thawkte pisa kai tur chu buaina chhuak lovin MZU main gate bul atangin a kir tir zel a. Acting Vice Chancellor, Prof. Lianzela pisa kai tur pawh zirlaite hian MZU main gate bul atang hian an let tir leh a ni. MZUSC hruaitute chuan kum 2016 May ni-18 atang khan Vice Chancellor nghet an neih tawh loh thu sawiin, Vice Chancellor nghet an neih hma chuan MZU-ah hian zirna chhunzawm a nih loh tur thu leh MZU-a thawktute pawh an hna thawk lo tura dan a nih tur thu an sawi a. Vice Chancellor nghet neih an ngiat chhung hian MZU kaihnawih programme engmah siam an remtih loh thu an sawi bawk. MZU main gate bul tual zawla zirlai pung kawmte hmaah MZUSC Vice President Malsawmsanga chuan, MZU in Vice Chancellor nghet an neih theih nan MZUSC chuan a tawp thlenga nawr an tum thu a sawi a, hei hi thlawp turin zirlaite chu a ngen bawk. MZUSC-ten MZU-a thawkte pisa kai tur an dan avang hian thawktute hi pisa kai thei lovin an haw leh vek a. MZU Campus chhunga chengte pawh zirlaite hian chhuak lo tura an ngen avangin, vawiinah chuan MZU-ah hian zirna chhunzawm a nih loh bakah office hna pawh thawh theih a ni lo a ni. MZUSC chuan naktukah pawh a hun ngaiah pisa kai tur hi an dang chhunzawm leh dawn a, vawiina MZU-a thawktu te pisa kai tur an dannaah hian Magistrate leh police thahnem tak duty-in, boruak sosang thei an veng a ni.