Mizo Carbon chungchang chhui chiang tura CBI koh luh dilna hnawl MNF-in ngai thiam lo

0
554
views

MNF party-in Mizo Carbon chungchang chhui chiang tura CBI koh luh dilna chu tun hnai khan Mizoram sorkarin a sut leh nia sawiin, an ngaih thiam loh thu an sawi. Hemi chungchangah hian MNF hruaituten vawiin khan CM, Pu Lal Thanhawla chu a pisaah hmu-in thil awm dan an zawt fiah a. MNF hotute chuan, Zo Carbon chhui tura CBI ko lut tura an ngenna, CM-in a chhanna-ah kumin June ni 9 khan CBI ko lut tura thil pawimawh a tifel tawh nia a sawi chu thla khat pawh a ral hma, July ni 31 khan Mizoram sorkarin a sut leh nia an hriat thu te, CBI koh luh dilna sut a nih chhan sorkarin a sawi ‘In the interest of public service’ tia inziak chu sawi chian an phut thu te, Lottery chungchang chhui tura CBI koh luh a rem loh chhan nia sawi, Lottery Distributor-te inkhin vang tih chu chhuanlam tling lo nia an ngaih thu leh a ruka pehhel tumna nia an ngaih thu, CM chu hrilhin Lottery a sum chingpen awm nia sawi leh Zo Carbon a sum hmanna dik lo nia lang chu CBI chhuitir turin an ngen nawn leh a ni.

CM chuan, Zo carbon chungchangah hian Ruatfela Nu-in High Court-ah PIL a thehluh avang leh, thubuai inchiah mek a nih avangin CBI koh luh chu a rem lo niin a sawi a, Lottery pawh sorkar ukilte thurawn anga tih a nih thu sawiin, Ukil dangte pawhin Union Home Minister hnenah lehkha an lo theh luh tawh thin thu leh anni pawhin tun thlenga chhanna an la hmuh loh thute sawiin CM chuan, thil tih dan an hriat chuan lehkha siam tur leh, a hming a lo ziah hnan tur thu, MNF hotute hi a lo hrilh a ni. Hemi hnua thuchhuah an siamah MNF chuan, chhuanlam hrang hrang siama Lottery leh Zo-Carbon a thil dik lo awm chhui loh tumna chu an ngaih thiam loh thu an sawi a, CM-in a lo sawi tawh anga CBI ko luta chhuitir ngei tura an phut thu sawiin, hei hi bawhzui a nih loh chuan, amah, CM ngei pawh he thilah hian a tel ve nia an ngaih tur thu leh CBI-in a chhui ngei theih nan an nawr chhunzawm zel tur thu an sawi a ni.