Naktuk-a hun tawp tawh tur, Rajya Sabha MP Pu Ronald Sapa Tlau-in MP a nih chhungin Congress MP niloin Mizoram MP a nihna chu a thiam ang tawkin a hlenchhuak nia a hriat thu a sawi.

0
105
views

Pu Ronald Sapa Tlau hian vawiin khan Aizawl Press Club tlawhin MJA member te nen an inkawm a, MP a nih chhungin Mizoram leh hnam tan theihtawp a chhuah tih a sawi a. sorkar hotute leh politician te chauh ni lo, mipui amah mamawh apiangte tan a theih ang chinah theihtawp a chhuah thin tih a sawi.

Parliamentary Committee-a a tel na te a thiam ang tawkin Mizoram tan a hmang tangkai tih Pu Ronald Sapa Tlau hian a sawi a, ZMC tihpuitlinna kawngah te, Thenzawla Golf Course siamnaah te sorkar laipui leh a pawnlama haichhuah ngai leh sut kuak ngai thil dangah te theihtawpin a bei thin tih a sawi a, Aizawl khawpui lirthei tawt lutuk tihziaawmna tura Mizoram sorkar remtihnaa hma a lakna erawh, a buaipuitute duh dan leh anni duhdan a inan loh avangin a hlawhtlinna a hmu hman ta lo chu a ui hle tih a sawi.
Pu Ronald Sapa Tlau chuan, MP a nih chhungin, Parliament House chhung leh pawnah Hindi thiam pawimawhna a hmuchiang hle tih a sawi a, Parliamentarian tha leh chak ni tur chuan Hindi leh Sap tawng nal taka hman theih a tul tih chu a zirchhuah a nih thu sawiin Hindi a thiam loh avangin duh ang tawka chet a lak a har chang a awm tih a sawi a. MP anih chhunga Mizo mipui duhsakna leh thlawpna a hmuh that avangin mipuite chungah lawm thu a sawi a, Rajya Sabha-a amah thlaktu tur Pu K.Vanlalvena chu duhsakna a hlan a ni.

MJA President Pu Zonunsanga Khiangte pawhin thusawiin Pu Ronald Sapa Tlau chu MP zingah an term chelh chhunga press mite huikhawm tam ber a nih thu a sawi a, MP awm leh zel tur te pawhin entawn se a duh tih a sawi a, FCI Consulatitive Committee chairman a nihna-ah press mite leh mipuiten FCI leh an hnathawh an hriatchian phah hle a ni a ti.

Pu Ronald Sapa Tlau hi kum 2014 khan Rajya Sabha MP atan thlan a ni a, naktuk hian a term a hmang zo dawn a ni. MP a nih chhung hian Parliamentary Committee on Health and Family Welfare-ah member a ni a. Mizoram State Consultative Committee on FCI chairman a ni bawk. MJA Gen Hqrs hian Pu Ronald Sapa Tlau hi ngaihhruina an lo hlan a ni.