National Health Mission hnuaia thawkten hlawh an lak theih loh avanga lungawi lohna lantirin vawiin atang khan Badge dum belin hna an thawk tan.

0
62
views

Hri leng dona kawnga thawktute zinga mi, NHM hnuaia thawktu tam zawk chuan May leh June thla hlawh an la dawng lo a, April thla atanga hlawh la hmu lo pawh an awm a ni. NHM Contractual Association hruaitute sawi danin, State pawn atanga lo hawte khung hrannaa Duty tam zawk chu NHM hnuaia thawk an ni a, ZMC-a sample endiktu leh Mizoram hmun hrang hranga Swap Sample latu tam zawkte pawh NHM hnuai thawk an ni.

NHM hnuaia hnathawkte lungawi lohna chungchang hi vawiin khan Health Minister hovin Health leh Finance Department hotute nen sawi ho a ni a. Sorkar hotute chuan, NHM hnuaia thawkte hlawh tur sum chu pek chhuah nghal a nih tur thu an hrilh a. HM Contractual Association hruaitute chuan, sum hi a taka pek a nih hunah Badge dum an bel chu an lak thlak tur thu an sawi a ni.

Sorkar laipui inkaihhruaina danah an hlawh tur chu State sorkar-a a luh atanga ni 15 chhungin NHM account-ah pekchhuah thin tur a ni tih NHM hnuaia thawktute hian an sawi a, hetiang a nih lai hian kum 2019-20 chhunga NHM tana pawisa lokal leh State sorkar tum ve tur zaa 10, a vaiin cheng nuai 3865 chu Mizoram sorkar-in a la pek loh avangin NHM hnuaia thawktute hian hlawh an la thei lo a ni. National Health Mission Contractual Association of Mizoram President, Pu Malsawmtluanga Hmar chuan, NHM hnuaia thawktu hi mi 1,665 an awm tih a sawi a. An member zingah hian Doctor 100 , Nurse 400 leh Health Worker 400 vel bakah Lab Technicians leh Programme staff engamawzat an awm tih a sawi a. Tun hma atangin hlawh lak mumal loh tum hi an lo nei fo tawh a, a chang chuan thla 6 chhung hlawh lak loh chang an nei thin thin tih sawiin, kuminah pawh March thla hlawh chu May thlaah an la chauh a, hetiang hi ni mahse, Cvvid 19 hri leng karah mipui tana thawk tur an nih angin thawm engmah an nei lo a, hetihrual hian an member-te chu thingtlang kilkhawr ber bera thawkte an nih avangin harsatna an tawk nasa hle a, inkharkhip karah April atanga June thleng hlawh la lote pawh an la awm avangin hlawh an lak thuai theih nan hetiang hi Sorkar an nawr ta tih a sawi.