Ni hnih chhunga Mizorama Covid-19 kai hmuh chhuah mi 13 zingah pakhat chiah RAT hmanga endiknaa reactive a ni a, State dang atanga lo haw hlimte Bairabi-a RAT hmanga endik thin chu tihtawp nghal a ni.

0
184
views

Vawiin lama Maharastra atanga Bairabi-a lo thleng tharte pawh RAT ti khawtlai tawh lovin anmahni khung hranna tur hmun panpui nghal zel an ni tawh dawn a. Lo haw tharte zawng zawng hi Laboratory-ah RT-PCR hmanga endik vek tum an ni tih ZONET thudawnna chuan a sawi.

Thawhtan zana covid-19 kai hmuh chhuah mi 12 bakah nizan, zan rei tawh lama hmuh chhuah belh leh tak mi pakhat nen, Mizoramah Covid-19 kai finfiah thar mi 13 an awm ta a, an vai hian State pawn atanga lo haw hlim, inkhunghranna hmuna awm vek an ni a, nizana hmuh chhuah thar hi Delhi atanga May ni 31-a lo haw mipa pakhat, kum 30 mi, Aizawl khawpui chhung quarantine centre pakhata awmlai a ni a, ani pawh hi RAT hmanga endiknaah rinhlelkai lo, non reactive a ni a, a khua a sik avangin a sample endik a ni a, covid-19 a kai tih hi hmuhchhuah a ni.

Thawhtan zana Covid 19 kai hmuh chhuah mi 12 te zinga 10 chu May ni 31-a Delhi atanga Rel hmanga Mizoram rawn thleng an ni a, midang pahnih chu Kolkata atanga May ni 31 vek-a Bus hmanga lo thleng an ni thung. An zinga 11, hmeichhia vek te chu Kolasib Thingdawl Quarantine Centre-a awm lai RAT hmanga endiknaah rinhlelh kai lo, nonreactive an ni a, RAT-a reactive awm chhun mipa pakhat chu Aizawl a thlen hnuah RAT a reactive avanga ZMC a dahluh nghal a ni.