Nikum November thla atanga Aizawl khawpuia lirthei nei ten a dahna tur garage an neih ngei ngeina tura sawrkar thupek chhuah chuan zawm a la hlawh tawk lo hle

0
751
views

Nikum November thla atanga Aizawl khawpuia lirthei nei ten a dahna tur garage an neih ngei ngeina tura sawrkar thupek chhuah chuan zawm a la hlawh tawk lo hle.

———————————————-

Zonet Report by K. Lalhruaitluanga

Aizawl khawpuia lirthei pung chak lutuk tur venna tur leh danin a phut anga lirthei nei thar ten a dahna tur garage an neih ngei ngei a ngaihna tura sorkar hmalakna chuan beisei angin zawm a la hlawh lova, nizan thleng khan Aizawl khawpui kawngpui lun lai-ah lirthei zan riah thahnem tak a la awm a ni. Kum 2009 April thla khan Aizawl Traffic SP chuan lirthei registration number MZ 01 F 7188 hnu lamte chu an lirthei dahna tur garage an neih ngei a ngaih thu leh a nei lote chu man zel a nih tur thu thupek a lo chhuah tawh a, hemi tum hian lirthei neitu dan zawm lo engemawzat chu hrem ni mahse hmalak chhunzawmna tha tawk a awm tak loh avangin garage nei lo kawngpui sira lirthei zan riaka dah thahnem tak a la awm a ni.

Mizoram State Assembly-in kum 2010-a ‘The Mizoram Motor Vehicle (Amendment) Rules 2010-a pawm atanga kum 7 liam hnu, kumin 2017 November ni 1 atang khan Aizawl Traffic Management Committee hmalakna-in lirthei nei zawng zawngte chuan a dahna tur garage an neih ngei a ngaih thu leh a nei lote chu dan anga man zel a nih tur thu thupek chhuah leh a ni. Hemi bawhzui hian Aizawl Traffic Management Committee hnuaia Working Group-te chuan Aizawl veng hrang hanga lirthei garage nei lote an enfiah bakah, veng tin Local Council-te chu an veng theuha lirthei awm zat leh a dahna nei leh nei lo chhinchhiah turin a ngen bawk.

Hetianga hmalakna thla 4 chhung kalpui a nih hnu hian nizan thleng khan Aizawl khawpui chhungah lirthei kawngpui sira riah hmuh tur thahnem tak an la awm reng bakah Aizawl District Transport Office-a lirthei thar register chu thla tin a pung zel a ni.