Nilaini zinglam dar 3:11 a na vak lova lir a nghin atanga darkar 59 hnu vawiin chawhnu dar 2:36 khan Tuipuiral tlangdung chu lirnghing na ang reng tak Magnitude 4.6 a nain sawi leh.

0
106
views

GSI mithiamte’n ni 10 vel thleng awh thei nia an sawi Tuipuirala lirnghing hi a ni 10-na Nilaini atang khan hriat chhunzawm ni tawh lo mahse, vawiin chawhnu-a nghing leh hian a sawi na leh viau a, mipui an chiai leh hle.

US Geological Survey tarlan danin 4.6 magnitude vela na-a nghing leh hi, a in tanna, Epicenter chu Farkawn khaw bul, Khankawn chhim lam hret a ni a. Lei chhungrila a nghin tanna focus hi kilometer 10 vela thuk nia chhin chhiah a ni bawk.

Khawbunga Zonet palai zawhna chhangin Farkawn HSS Principal Pu Haukhawliana chuan lirnghing hian hriat thama a sawi thu leh vawi khat a rik sawk bak nghing chhunzawm a awm loh thu a sawi, thil tihchhiat engmah a awm a hriat loh thu a sawi. Khawbungah chuan bang rela thil rem tla a awm nual a ni.

June ni 22 zinglama na ang reng taka lirnghing khan Khawbung, Zokhawthar leh Khuangleng te a sawi na zual a, mihring thi leh hliam awm lo mahse, Biak in leh chenna in thahnem takin a tuar a, Khuangleng, Khuangthing, Vaphai, Sesih, Samthang, Farkawn, Khankawn leh Tuipuiral tlangdung khaw hrang hranga cheng mipuite an ralkhel hle a ni.