Nimin khan Covid 19 hri kai mi 6 hmuh belh an ni a, Mizorama hri kai hmuh chhuah tawh chu 197 an tling ta a, dam 139 an awm tawh.

0
10
views

Hri kai hmuh tharte hi ZMC Covid 19 Testing Laboratory-a hmuh an ni a, Aizawl District mi 5 leh Siaha District mi 1 an ni. Aizawl District mite hi Lungverha National Disaster Response Force mi leh sa vek an ni a, an vai hian mipa vek niin, kum 30 atanga 54 inkar an ni a. An zinga 4 chu State pawn atanga lo haw an ni a. Pakhat erawh chu Lungverh a awm lai positive contact atanga kai a ni.

Siaha-a hri kai hmuh thar chu hmeichhia kum 23 a ni a, nimina hri kai hmuh tharte hi an vaiin inkhunghranna hmun, Quarantine Facility a awm lai vek, hriselna lama harsatna nei lo vek an ni. Nimina hri kai hmuh thar mi 6-te nen hian Mizorama hri kai hmuh chhuah chu 197 an tling ta a, hetihrual hian vawiin khan Mamit District-a hri kai enkawl mek 10 zinga 6, mipa 2 leh hmeichhia 4 chu an dam tawh avangin vawiin khan Covid Care Centre atanga chhuah tir an ni a, heng mite hian Mizorama Covid 19 hri kai enkawl dam tawh chu 139 an tling tawh a. Hri kai hmuh chhuah tawh zawng zawng atanga dam zat hi zaa 75.55 a ni a, hri kai enkawl mek mi 58 an la awm a ni.

Hnahthial District chu hri kai la awm lohna District a ni chhunzawm zel a. Saitual-a hri kai 3, Kolasib-a hri kai 11, Khawzawl leh Serchhip District-a hri kai 3 ve ve chu enkawl dam an ni tawh a. Covid 19 hri kai hmuh chhuah tamna ber ni ta Aizawl District-ah chuan hri kai 58 an awm tawh a, an zinga 32 enkawl dam tawhin, enkawl mek 26 an awm a. Lunglei District-a hri kai hmuh tawh 54 zinga 46 dam tawhin, enkawl mek mi 8 a la awm a. Mamit-a hri kai enkawl lai 10 zinga 6 chu vawiin khan damdawi in atanga chhuah tir an ni a, hetihian Mamit District-a hri kai hmuh tawh 20 zing 16 dam tawhin, mi 4 enkawl mek an ni a. Siaha-a hri kai 23 zinga 9 an dam tawh a, enkawl lai 14 an awm a. Champhai-a hri kai 10 zinga 8 dam tawhin, mi 2 enkawl mek an ni a. Lawngtlai-a hri kai 12 hmuh tawh zinga 8 dam tawhin, mi 4 enkawl mek an ni.

Vawiin khan ZMC Covid-19 laboratory-ah ZMC, Aizawl leh Kolasib District atanga sample dawn 115 vel endik a ni a, zaninah result hriat theih beisei a ni. Vawiin khan Falkawn damdawi inah Covid 19 damlo mi 5 admit thar an ni a. Hetihian ZMC-a Covid 19 damlo enkawl mek chu mi 27 an ni a, Mipa 20 leh Hmeichhia 7, Aizawl mi 26 leh Lunglei mi 1, kum 3 atanga 56 inkar an ni a. Harsatna em em nei an awm lo a ni.