Nimina ZMC Covid 19 testing Laboratory-a sample endik zingah hri kai 2 hmuh thar an ni a, vawiin khan damlo damdawi in atanga chhuah tir mi pakhat a awm.

0
59
views

Hri kai hmuh tharte hi hi Champhai leh Aizawl District mi, mipa leh hmeichhia, kum 55 leh 56 mi an ni a, Champhai mi hi mipa, Myanmar atanga lo haw, inkhunghranna hmuna awm mek a ni a. Aizawl mi hi June 12-a Covid 19 hri a kai tih hmuhchhuah MST bus conductor nupui kha a ni a, a pasal erawh chuan vawiin khan damin damdawi in a chhuahsan thung a ni. Nimina hri kai hmuh thar 2 nen hian Mizorama Covid 19 hri kai hmuh chhuah chu 162 an tling ta a, enkawl dam damdawi in atanga chhuah tir 127 awm tawhin, an zinga mithenkhat chu hri lakah an fihlim thuai dawn nia beisei a ni a, damdawi ina enkawl mek 35 an la awm a ni.

Hnahthial District chu hri kai la awm lohna District a ni chhunzawm zel a. Lawngtlai-a hri kai 8, Saitual-a hri kai 3, Kolasib-a hri kai 11 leh serchhip District-a hri kai 3 chu enkawl dam vek an ni tawh a. Covid 19 hri kai hmuh chhuah tamna ber Lunglei District-a hri kai enkawl 47 zinga 46 dam tawhin, enkawl mek mi 1 a la awm a. Mamit-a hri kai enkawl lai 10 an awm a, chung zinga 4 chu hri lakah an fihlim thei dawn nia ngaih a ni. Aizawl District-a hri kai hmuh tawh 39 zinga 32 dam tawhin, mi 7 enkawl mek an ni a, Siaha-a hri kai enkawl lai 10 awmin, mi 8 an dam tawh a, Champhai-a hri kai 10 zinga 5 dam tawhin, mi 5 enkawl mek an ni . Khawzawl-ah pawh hri kai 2 zinga 1 a dam tawh a ni.

Vawiin khan ZMC Covid 19 laboratory-ah ZMC leh Aizawl District atanga Sample dawn 100 chuang endik a ni a, zaninah result hriat theih beisei a ni. Vawiin khan Falkawn damdawi inah Covid 19 damlo 1 leh hri kai rinhlelh mi 1 admit thar an ni. Hri kai rinhlelh hi a sample lak nghal niin, naktukah endik tura thawn a ni ang.

ZMC bikah tun dinhmunah Covid 19 damlo mi 7 enkawl mek an ni a. Heng damlote hi Aizawl mi vek niin, Mipa 1 leh Hmeichhia 6, kum 3 atanga kum 55 inkar an ni a, an zingah harsatna em em nei awm lo a ni.