Nizan khan Lungleiah Covid 19 hri kai mi 5 hmuh belh an ni a, Inrinnia hri kai hmuh thar mi 24 hmuh belh nen Mizorama hri kai hmuh chhuah tawh chu 191 an tling ta.

0
14
views

Sorkar thuchhuah tarlan danin, nizan khan Lunglei-a TrueNAT khawl hmangin sample 25 tlaivara endik a ni a, an zinga 5 chu hri kai tih finfiah niin, heng mite hi BSF sipai vek an ni a, an vai hian Vanhne BSF Quarantine Centre-a awm lai an ni a, kum 25 atanga 52 inkar, State pawn atanga lo haw an ni a, an zinga pakhat chu BSF chaw chhum a ni. Inrinni khan Lunglei-a TrueNAT khawl hmang hian sample 7 endik zingah mi 2-in Covid-19 an kai tih hmuh chhuah a lo ni tawh a, heng mite hi BSF sipai ve ve, state pawn atanga lo let an ni.

Inrinn-a ZMC Covid 19 Testing Laboratory-a sample endiknaah hri kai 22 hmuh thar an ni a, mi 443 chu hri lakah an fihlim thung a. Heng mi-te mipa 19 leh hmeichhia 3, kum 21 atanga 56 inkar an ni a. Aizawl district mi 14, Siaha leh lawngtlai district mi 4 ve ve an ni. Aizawl district-a hri kai hmuh thar mi 14-te hi Lungverha awm 1st Bn. NDRF mi 10 leh Zokhawsanga awm Assam Rifles mi 4 an ni. State dang atanga lo kal vek an ni a, Siaha district mi 4-te pawh Delhi atanga lo haw vek an ni a, Lawngtlai district mi 4-te pawh Guwahati atanga lo haw an ni. Nimina hri kai hmuh thar nen hian Mizorama hri kai hmuh chhuah tawh chu 191 an tling ta a, hetihrual hian enkawl dam, damdawi in atanga chhuah tir 133 awm tawhin, hri kai hmuh chhuah tawh zawng zawng atanga dam zat hi zaa 69.63 a ni a, hri kai enkawl mek mi 58 an la awm a, an zinga mi thenkhat chu dam mai tura ngaih an ni.

Hnahthial District chu hri kai la awm lohna District a ni chhunzawm zel a. Saitual-a hri kai 3, Kolasib-a hri kai 11, Khawzawl leh Serchhip District-a hri kai 3 ve ve chu enkawl dam an ni tawh a. Covid 19 hri kai hmuh chhuah tamna ber Lunglei District-a hri kai hmuh tawh 54 zinga 46 dam tawhin, enkawl mek mi 8 a la awm a. Aizawl District-a hri kai hmuh tawh 53 zinga 32 dam tawhin, enkawl lai 21 an awm a. Mamit-a hri kai 20 zinga 10 enkawl dam tawh niin, enkawl lai 10 an awm a, an zinga mi thenkhat chu hri lakah an fihlim thei dawn nia ngaih a ni. Siaha-a hri kai 22 zinga 9 an dam tawh a, enkawl lai 13 an awm a. Champhai-a hri kai 10 zinga 8 dam tawhin, mi 2 enkawl mek an ni a. Lawngtlai-a hri kai 12 hmuh tawh zinga 8 dam tawhin, mi 4 enkawl mek an ni.

Vawiin khan ZMC Covid-19 laboratory-ah sample 50 vel endik a ni a, result chu zanin hriat theih beisei a ni a, vawiina sample endikte hi ZMC, Serchhip,Champhai leh Aizawl District atanga sample dawnte a ni. Vawiin khan Falkawn damdawi inah Covid 19 hri kai rinhlelh mi 3 admit an ni. An zinga mi pakhat chu ramri a duty thin, Champhai atanga rawn thawn a ni a, ICU ah admit a ni a. A sample hi endik ngal niin, zaninah result hriat theih beisei a ni. ZMC bikah Covid 19 damlo mi 22 enkawl mek an ni a, Mipa 15 leh Hmeichhia 7 niin, an zinga mi 21 chu Aizawl District mi leh midang pakhat chu Lunglei District mi a ni a. Heng damlote hi kum 3 atanga 56 inkar an ni.