Sorkar enkawl leh mimal enkawl school-a zirtirtu zawng zawngin training an pal chhuak ngei tur a ni tih sorkar laipui thupek in zirna a tih hmasawn ngei beisei a nih thu School Education Minister Pu H Rohluna’n a sawi. Ramhlun North Govt. Model English Medium Primary School in vawiina kum 50 an tlin, Golden Jubilee an lawmna hmanpuiin Education Minister Pu H Rohluna chuan, sorkar laipui thupek bawhzuiin tunah hian NIOS kal tlangin zirtitirtute tan remchanna siam a nih thu a sawi a, he hmalakna hian zirna lamah nasa takin hmasawnna a thlen beisei a ni a ti. Pu H Rohluna chuan zirna tih hmasawn nan sorkar in district hrang hranga Sorkar enkawl Primary school thenkhat chu model school atan a thlang chhuak tih a sawi bawk. Minister hian Jubilee lawmpui nan Computer set khat a pe a ni. Govt. Model English Medium Primary School hi kum 1968 March ni 1 khan din a ni a, a tirah Govt. Primary School II tih a ni a, kum 2016 a sorkarin Model Primary school a thlan zingah telin heta tang hian Govt. Model English Medium Primary School tih hming a lo pu ta a ni. Tun dinhmunah zirtirtu 12 leh zirlai 123 an awm a. Jubilee lawmna hi Headmaster Pu C Biaknghinglova’n a kaihruai a, bialtu MLA leh he school a lo thawk tawh ten an hmanpui bawk.
