Parliamentary Secretary 7-in CM hnenah banna an thehlut

0
330
views

Mizoram sorkara Parliamentary Secretary 7-in CM, Pu Lal Thanhawla hnenah banna an thehlut. Banna thehluttute hi Lt. Col. ZS Zuala, Pu KS Thanga, Pu TT Zothansanga, Pu Joseph Lalhimpuia, Pu Hmingdailova Khiangte, Pu K. Lalrinthanga leh Pu H. Zothangliana te an ni a, CM Office-ah a huhova kalin an banna hi an thehlut a ni. Banna an thehluh chhan zawhna chhangin an aiawha thusawitu, Pu KS Thanga chuan an banna chhan chu nakkuma Mizoram Assembly inthlanna tura an party tihchak an duh vang niin a sawi a, inthlan hun hi a hun pangngai aia hmaa ruat theih a nih avangin, inbuatsaihna hun tam zawk neih theih a ngai niin a sawi bawk. Pu KS Thanga chuan Parliamentary Secretary chungchangah hian hman ni lawkah Supreme Court thutlukna a awm tih sawiin, hei hi an ban chhan ber ni lo mah se, dan siamtu an nih angin Supreme thutlukna chu an pawisak a tul niin a sawi bawk. Zawhna chhangin Pu KS Thanga chuan Parliamentary Secretary atanga an banna chhan chu Minister nih beisei vang ni lovin a sawi a, mi 7 tan Minister nih beisei ngaihna a awm lo tih sawiin, an awm dan tur chu an party hruaitute rel dan ang ang a ni dawn niin a sawi a, party-a an dinhmun tur leh hnathawh tur pawh an party President leh Office Bearer dangten an la relsak dawn niin a sawi.

Hemi hma hian PRISM chuan Parliamentary Secretary te ban tur hian CM, Pu Lal Thanhawla hnenah ngenna an lo thehlut tawh a, an ngenna-ah chuan Parliamentary Secretary-te chu dan kalha dah niin an sawi a, tul lova sorkar sum tam tak senna niin an sawi bawk. MNF Party pawhin Mizorama Congress sorkar, Pu Lal Thanhawla kaihhruaiin Parliamentary Secretary 7 a dah chu dan lova dah nia sawiin, Guahati High Court-ah paih tura ngenna an lo thlen tawh a, an Party President, Pu Zoramthanga’n ZONET a hrilh danin High Court-a an thu thehluh chu Supreme Court-in a ngaihtuah lai a nih avangin an bawhzui lova, Supreme Court-in thutlukna a siam tak avangin chu chu zawm mai tur niin an party chuan a ngai niin a sawi.