Supreme Court-in July 26 khan Parliamentary Secretary dah theihna dan

0
338
views

Thla hlui ni 26-ah khan Supreme Court chuan Assam Parl. Secretaries (Appointment, Salaries, Allowances and Miscellaneous Provisions) Act of 2004 chu dan kalh nia sawia khinna chungchangah a thu tlukna a puang a, Parl. Secretary dah theihna dan, Assam sorkarin a siam chu a hnawl a, State Legislative Assembly-in hetiang dan siam tur hian thuneihna a nei lo niin a sawi.
Ram danpui Article 164 (1A)-ah state Council of Ministers chu Assembly member awm zat zaa 15 aiin a lian tur a ni lo tih a awm avangin, hei hi state sorkar dan siamin a bawhchhe thei lo tih Court sang ber chuan a sawi a, ram danpui siam that vawi 91-naah kum 2003 khan hei hi telh a ni a, hman tan a nih khan Assam Assembly-a MLA 126 zinga 36 chu Council of ministers-ah an tel a, hei hi Assembly member zaa 28.57 lai a nih avangin 19-ah tihtlem an ngai a ni. Hemi hnu hian Assam sorkar chuan kum 2004 November ni 3-ah khan Assam Parliamentary Secretaries (Appointment, Salaries, Allowances and Miscellaneous Provisions) Ordinance a siam a, he dan hnuaia Section 4-naah chuan Parliamentary Secretary chu Minister of State tlukah dah a ni a, kum 2005 May ni 30-ah Parliamentary Secretary ruat an ni ta a ni. Hei hi Supreme Court-ah thlen a ni ta a, state sorkar chuan ram danpui Article 194-na hnuaiah hei hi a siam thei nia sawiin, Parliamentary Secretary dinhmun leh a hnathawh dan chu Minister nen a inan loh avangin ram danpui hi a bawhchhe lo niin a sawi a, mahse hei hi Supreme Court-in a hnawl ta a ni. Supreme Court-in hetiang thutlukna a siam tak avang hian hmarchhak biala state hrang hrangin Parl. Secretary an neih lai 93 te chu an ban a ngai ta a, heng zingah hian Mizorama Parl Secretary 7, Arunachal Pradesh-a Parl Secretary 31, Nagaland-a 26, Meghalaya-17 leh Manipur-a 12 an tel a ni.