Pawngsual leh hlei lenna tawk, hmeichhia leh naupang kum tling lo mi 13 hnenah zangnadawmna pe

0
619
views

The Mizoram Victims of Crime Compensation Scheme, 2011 hmangin pawngsual leh hlei lenna tawk, hmeichhia leh naupang kum tling lo mi 13 chu vawiin khan zangnadawmna pek an ni. Hemi puala inkhawm, Aijal Club-a buatsaihah Law & Judicial Minister, Pu Lalsawta chuan, pawngsual leh hlei lenna tawk leh nunna hial chan an awm chu lungchhiatthlak a tih thu a sawi a, sual do kawnga sorkar tan lakna chu a hlawhtlin theih nan mipui thlawpna a pawimawh thu a sawi. The Mizoram Victims of Crime Compensation Scheme, 2011 hi Mizoram sorkarin BPL chhungkuaa mi kut palh leh pawi khawina tuarte chhawmdawlna atana a duan a ni a, zangnadawmna hi hetiang thil thlen atanga thla 6 chhunga dil tur a ni a, mi kut an tawrh dan a zirin zangna dawmna hi pek thin a ni. Zangnadawmna hi vawiin khan mi 13 pek an ni a, Rs 33,75,000 sem a ni a, a hmain mi 27 hnenah Aizawl District Legal Services Authority hian a lo sem tawh bawk a ni. He inkhawm hi State Legal Services Authority Member Secretary, Pu Joel Joseph Denga’n a kaihruai a, Aizawl District Legal Services Authority Chairman, Pi Lucy Lalrinthari’n thu a sawi bawk.