Prism President, Pu Vanlalruata’n Sorkar khalh ngil tura kum 10 chuang zet hma an lak hnua Political Party anga an indin tak chhan chu hemi kawnga chak zawka hmalak theih an beisei vang a nih thu a sawi

0
217
views

Prism President, Pu Vanlalruata’n Sorkar khalh ngil tura kum 10 chuang zet hma an lak hnua Political Party anga an indin tak chhan chu hemi kawnga chak zawka hmalak theih an beisei vang a nih thu a sawi. Election Commission of India in Political Party Registration an dil a pawmsak lawmna, vawiina Upper Republic-a an Party Pisa-a neihah he thu hi a sawi a, tun a\ang chuan Prism chu Political Party tak tak a ni tih hriatpui turin Mizoram mipuite a sawm a ni. Pu Vanlalruata chuan, mi tam takin Political Party-a an inlet chu an ui thu leh NGO anga sorkar khalh ngiltu atana awm tura an duh thu an sawi \hin chu thil an hriat chian loh vang a ni tih sawiin, Political Party-a an inleh avang hian eiruk dona leh kawng hrang hranga Sorkar khalh ngil tura an hmalakna chu an tawpsan mai dawn tihna a nih loh thu sawiin, hemi kawngah hian nasa zawka \anlak chhunzawm zel an tum thu a sawi. Eirukna leh thil \ha lo do kawngah an tih theih zawng zawng an ti zo tawh nia sawiin, Pu Vanlalruata chuan an hmalakna vangin eiru leh thil dik lo tam tak haichhuah a ni chungin thil tisualtute hrem an nih theih chuan loh avangin a siam \hatu ni tura Political Platform a\anga hmalak an tum ta zawk tih a sawi. Prism President chuan, Mizorama Sorkar awm tawhten a takin eirukna an do ngam lo nia sawiin, Chief Minister ber pawhin Minister leh Officer zingah Sorkar pawisa \ham ching an awm thu a sawi chungin heng mite lakah hian hremna a lekkawh ngam chuang lo niin a sawi a. Hei hian eiruk do kawnga sorkar chak loh zia a tarlang chiang hle a ni, a ti a. Aan Party-in thuneihna a chang a nih chuan eiruk hmangte a man dawn a, a \ul a nih chuan Officer leh Minister hluite thlenga man an nih tur thu a sawi. Sum leh pai enkawl kawngah Mizoram Sorkar chu hlawhchham lailet derah puhin Pu Vanlalruata chuan, Assembly Budget Session neih zawh taka Finance Minister-in tuna kal dan bak tih ngaihna a hriat tawh loh thu a sawi chu sorkar enkawl zel tlak an nih loh thu tichiangtu a ni tih sawiin, 2018-19 Budget-ah sorkar hnathawk hlawh leh inenkawlna hrang hrang a daih lo saa dah a ni te, Mizoram zaa 60 vel loneitute chanvo nasa taka tlahniam leh zirlaite tana Scholarship leh Excursion neihna tur a daih lova dah a ni chu hrilhhaithlak an nih thu sawiin, Mizoram Budget an sawisel chungchangah Sorkar lai MLA \henkhatin Budget awmzia hre chiang lova an puh chu na an tih thu leh hetianga puhtute chu engtik lai pawhin mipui hmaa Debate neihpui an inpeih thu a sawi bawk. An pawl General Secretary, Pu Lalrinzuala Chawngthu sawi danin, Prism hi nikum November ni 3 khan Political party anga din \an a ni a, hemi thla vek ni 27-ah Election Commission of India-ah Political party anga inziahluh phalna an dil a. Kumin March ni 16 khan Registration an dilna chu pawm a nih thu hriattirna an dawn hnuah nimin khan Political Party Registration an dilna chu pawm a nih thu hriattirna an dawng a ni. Prism Party hian Sorkar \ha siam tura inthlan chuh ve tura thu an dah bawhzuiin karleh thawhleh zan dar 8 hian Ignite Studio-ah Candidate puan thawhkhatna an nei dawn a, hetah hian an party Ticket-a inthlan chuh tur hming 10 an puang phawt dawn a ni.