Central Pool atanga Mizoramin Medical Course-a seat a neih tihtlem a nih chungchanga sorkar laipui hotute dawra New Delhi-a cham mek, Higher and Techincal Education Minister, Pu R. Romawia chuan Mizoramin MBBS seat a chan zat chu a pun theih a beiseiawm lo niin Zonet a hrilh a. New Delhi-a an kal chhan ber, Union Health Minister, Pu Jaggat Nadda chu a zin bo avangin hmuh theih a ni lova, nimin tlai khan Union Health Ministry-a Joint Secretary, Pu Arun Singhal chu thil awm dan a sawipui a, state hrang hrang hnena sorkar laipuiin seat a sem dan chu, an state-a mihring awm zat a zira sem rual a nih thu a lo hrilh tih sawiin, thutlukna siamtu tur ber, Union Health Minister an biak theih tak loh avangin an zinna chuan awmzia a neih lutuk loh bakah, Mizoram seat chan zat hi tipung turin state dangte seat chan chu chhuhsak then a ngaih dawn avangin, a beiseiawm tehchiam lo niin a sawi. Pu R. Romawia chuan, Mizoramin MBBS seat a chan hi tihpun theih ni lo mah se, BDS seat a hmuh zat erawh chu a pun theih beisei a nih thu a sawi a, vawiin tlai hian H&TE Secretary, Pu Benjamin-a’n thuneitute a dawr leh tur thu leh, hetah hian thutlukna an siam theih a beisei thu a sawi.
Zonet zawhna chhangin Minister chuan, Mizoram Quota-a MBBS leh BDS zir turten tun thla ni 31 ral hmaa Admission an tih hman a ngaih tawh avangin a rang thei ang bera Counselling buatsaih a nih tur thu a sawi a. Hemi buaipui tur hian a ruala zin ve, H&TE Secretary, Pu Benjamin-a chuan vawiin tlai hian New Delhi atangin Kolkata a pan ang a, naktuk chawhma lamah Mizoram lo thlengin thil tihfel ngaite a buaipui nghal dawn niin a sawi. Puan tawh angin, Central Pool atanga Mizoramin Medical Course zirna atana seat a chan zat chu nikum aiin 8-in a tlem zawk a. Kuminah hian Mizoramin MBBS seat 17 leh BDS seat 3, a vaiin Seat 20 a chang a, MBBS bikah hian nikuma Mizoramin Central Pool atanga seat a hmuh zat, 25 chu 8-in a tlem zawk a ni. MBBS leh BDS zir tura Central Pool atanga seat 20 bakah hian North Eastern Council hnuaiah seat 11 hmuh a ni bawk. Central Pool atanga Mizoramin Medical Course-a Seat a neih tihtlem a nih chungchangah hian Mizoram MP pahnih, Pu CL Ruala leh Pu Ronald Sapa Tlau pawhin Thawhtanni khan sorkar laipui hotute an lo titipui tawh bawk a ni.
