Pu Robert Hrangdawla’n bail-a chhuah lailawk a dilna court-in a ngaihtuah

0
266
views

Damdawi ruih theih thubuai avanga Central Jail-a tang mek, IAS Officer chawl tawh, Pu Robert Hrangdawla’n bail-a chhuah lailawk a dilna chu vawiin khan Special Court (Drug and Cosmetics Act) Judge, Pu Vanlalenmawia Court-in a ngaihtuah a, tun kar Zirtawpniah ngaihtuah leh a ni dawn. Sorkar ukil hnen a\anga Zonet thu dawn danin, Pu Robert Hrangdawla Ukil chuan, Pu Robert Hrangdawla hi zunthlum natna vei nia sawiin, Jail-ah inenkawlna \ha a awm loh avangin Jail-a khung reng a nih chuan a hriselnain a tuar thei dawn niin Court chu a hrilh a. Pu Vanlalenmawia Court chuan, Pu Robert Hrangdawla Ukil-in Jail chhunga a inenkawlna nia Court hmaa a tarlan chu damdawi lehkha satliah, Seal pawh chuang lo a nih avang leh a zunthlum endik tura Jail pawna hruai a nih loh avangin a hrisel lohna chungchang chu pawm mai a harsat thu a sawi a. Pu Robert Hrangdawla chu Mizoram sorkar hnuaia Medical Board hmaah inlan tur leh a hrisel loh dan kimchang tihchianna tur lehkha la turin a hriattir a. Hei hi ni 2 chhunga buaipui nghal turin Aizawl Civil Hospital-a Medical Superintendent leh Central Jail-a Special Superintendent chu Court-in a hriattir nghal a ni.

Puan tawh angin, damdawi tawlhruk thubuaia inhnamhnawiha puh a nih avangin IAS Officer chawl tawh, Pu Robert Hrangdawla hi tun thla ni 4 khan Court thupek anga man niin, hemi ni vek hian Central Jail-a dah nghal a ni a. A rual hian a hnuaia hnathawk, Lalchhanmawia pawh Central Jail-a dah luh a ni bawk.