Pu Robert Hrangdawla’n Bail-a chhuah lailawk a dilna ngaihtuahna tur sawn

0
288
views

Damdawi ruih theih man thubuai avanga Central Jail-a tang mek, IAS Officer chawl tawh, Pu Robert Hrangdawla’n Bail-a chhuah lailawk a dilna ngaihtuahna tur chu a Ukil-in lehkha pawimawh, Court-a a thehluh hman loh avangin sawn a ni. Puan tawh angin, tunkar Nilaini khan Pu Robert Hrangdawla Ukil hian Pu Robert Hrangdawla hi zunthlum natna vei nia sawiin, Jail-ah inenkawlna \ha a awm bawk si loh avangin Jail-a khung reng a nih chuan a hriselnain a tuar thei dawn niin a sawi a, Court chu Bail-a chhuah lailawk phalsak turin a ngen a ni. A dilna ngaihtuahtu, Special Court (Drug and Cosmetics Act) Judge, Pu Vanlalenmawia Court chuan, Pu Robert Hrangdawla ukil-in Jail chhunga a inenkawlna nia Court hmaa a tarlan chu damdawi lehkha satliah, Seal pawh chuang lo a nih avang leh a zunthlum endik tura Jail pawna hruai a nih loh avangin a hrisel lohna chungchang chu pawm mai a harsat thu a sawi a. Pu Robert Hrangdawla chu Mizoram sorkar hnuaia Medical Board hmaah inlan tur leh a hrisel loh dan kimchang tihchianna tur lehkha la turin a hriattir a. Hei hi ni 2 chhunga buaipui nghal turin Hospital and Medical Education Director leh Central Jail-a Special Superintendent chu hriattirin, vawiin hian an lehkha chu Court-a thehlut turin a ti a. He thupek anga Pu Robert Hrangdawla hriselna endikna lehkha chu vawiin khan peih hman a nih loh avangin Court chuan tun thla ni 18, kar leh Nilaini thleng, Pu Pu Robert Hrangdawla hriselna endik nan Medical Board chu hun a pe a. A hriselna endikna lehkha chu a Ukil-ten Court-a an thehluh hun hunah Bail-a chhuah a dilna hi Court chuan a ngaihtuah dawn a ni.

Puan tawh angin, damdawi tawlhruk thubuaia inhnamhnawiha puh a nih avangin IAS Officer chawl tawh, Pu Robert Hrangdawla hi tun thla ni 4 khan Court thupek anga man a ni a, hemi ni vek hian Central Jail-a dah nghal a ni a. A rual hian a hnuaia thawk, Lalchhanmawia pawh Central Jail-a dah a ni bawk.