Ram zalenna champha, Independence Day vawi 72-an chu ramchhung hmun dangte rualin Mizoramah pawh lawm a ni.

0
625
views

A lawmna pui ber, Aizawl Lammuala neih chu Chief Minister, Pu Lal Thanhawla’n a hmanpui a, hnam puanzar pawt pharhin Parade Contingent-te chibai a chhang let a ni. Independence Day thuchah a sawiah Chief Minister chuan vawiin hi India khua leh tui tan ni pawimawh tak a ni tih sawiin, kumpinu awpna lak a\anga Hnampa, Mahatma Gandhi leh hruaitu dangte beihna zarah zalenna hlu tak hi a lo awm ta a, a champha vawi 72-na hial lawm theih a ni ta chu thil lawmawm tak a ni tih a sawi a. Remna hi a hlu a, a man pawh a to avangin vawn nun a ngai a. Mizoram Sorkar pawhin tunhnaiah HPC-D te \hianah siamin an silai an tung a, tun dinhmunah Mizoram chu harsatna nei lovin a awm ta niin a sawi.

Chief Minister chuan Mizoram chu hmalam pan tura buatsaih mek a ni tih sawiin, ram leilung faten he ram siam\hatna kawngah mawhphurhna inang vek an nei a, chumi tihpuitlin kawngah chuan Sorkar Programme tipuitling tura theihtawp chhuah a \an lak tlan a ngai tih a sawi. Kawlphetha-a intodelh tura \an lak mek a ni tih sawiin, Pu Lal Thanhawla chuan kawlphetha megawatt 60 pechhuak thei Tuirial Hydro Electrict Project chu tunhnaiah Prime Minister, Pu Narendra Modi-a’n a hawng tawh a, kawlphetha megawatt 42 pe chhuak thei tur Tuirini Hydro Electric Project chu State Sorkar kuta a awm theih nan megawatt 25 pechhuak thei turah siamrem niin, hemi atan hian hmalak mek a ni a. Hei bakah hian Vankal dai-ah ni zung chakna hmanga kawlphetha megawatt 20 siam mek a nih bakah Magnetic Mizoram hmalakna hnuaiah Company engemawzatin hmalak an duh thu an rawn thlen a, hemi hnuaiah hian nizung chakna hmanga kawlphetha megawatt 100 chuang siam turin Company \henkhat nen thawh hona thuthlung siam a ni tawh tih a sawi. Sairanga rel kawng lut tur chu Kawrpuichhuah-a Bangladesh nena insumdawn tawnna hmunpui siam tur thleng la lut tura Survey pawh neih fel tawh a nih thu Pu Lal Thanhawla chuan a sawi. Heta \ang hian Lawngtlai thleng lak chhoh leh tur niin, Mizoram chu Asia chhim chhak ramte insumdawn tawnna hmun atan buatsaih mek a ni a, tunah hian Myanmar Sorkar nen pawh Border Trade Point changtlung tak kalpui tawh niin, hei hi insumdawn tawnna mai bakah chanchin \ha hrilhna remchang tak a ni nghal dawn niin a sawi. Hman lai chuan Mizoram chhim lam chu chhuahka pawimawh a ni \hin a, hetiang hi a nih leh theih nan \anlak mek a nih thu a sawi.

Pu Lal Thanhawla chuan, |halaite chu hun kal zelah ram kaihruaitu an la nih dawn avangin nun an uluk a ngai hle tih a sawi a, nu leh pa chawimawi a, aia upa zah nachang an hriat chuan hlawhtlinna-in a hmuak tih hre turin a chah a. |halaite tan khawvel thar siam tura hma an laknaah khelmual \ha hmun engemaw zatah hawn tawh niin, hawn mai hmabak pawh a awm nual a, hengte hmang hian \halaiten hlawhtlinna an hmu chho zel nia sawiin, tun hma chuan Mizo \halai \hahnem tak sipaiah an \ang \hin a, rambuai hnuah sipaia \ang hi nasa takin an tlem a, Mizo \halai tam zawk sipaia an luh leh theih nan Mizoram Youth Commssion chuan \an a la mek a, hei bakah hian Tuirialah NCC hmunpui siam chhoh mek a ni a, Lungleiah pawh NCC Battalion lian, Cadet 3,000 vel awm theihna tur buatsaih mek a ni tih a sawi bawk.

Lammuala Independence Day lawmna hi zing dar 9-ah \an a ni a, Chief Minister hian hnam puanzar pawt pharhin, Parade Contingent 30-te hnam puanzar chibai buk a chhang let a, Armed Contingent, Unarmed Contingent leh School Contingent zinga ti\hate hnenah lawmman a hlan a. President’s Police Medal for Distinguished Service chu DIG Northern Range, Pu Lalbiakthanga Khiangte leh Fire & Emergency Services Director, Pu PC Lalchhuanawma hnenah a hlan a. Police Medal for Meritorious Service chu SP (Wireless), Pu PC Lallianthanga, CID SP Pu Rodingliana Chawngthu, Thenzawl Police Training School-a Principal, Pu Lalsanglura, Aizawl DEF-a Inspector, Pu Vanlaltluanga Parte leh Pu Laldawngliana leh 3rd Battalion MAP CO, Pu K. Lalremsanga, Governor’s Gold Medal chu 2nd IR Battalion-a SI, Zangura Khiangte, leh Traffic Constable, H. Lalrindika, Governor’s Silver Medal chu Lunglei DEF-a Inspector, Pu H.S. Lalmuanpuia leh 2nd Bn. MAP-a Inspector, Pu F. Vanlalkima hnenah a hlan a, Zirtirtu hna thawk \ha Govt. Diakkawn High School Headmaster, Pu G.S. Zaithantluanga, Govt. Chaltlang Middle School Headmaster, Pu Lalpiangthara leh Govt. Tlungvel Primary School-II Headmaster, Pu H. Lalrinchhana hnenah State Award for Teachers, 2018 hlan a ni a. Nakkum Independence Day lawmnaa President’s Police Medal for Distinguished Service dawng turin Aizawl Traffic SP, Pu H. Ramthlengliana, Police Medal for Meritorious Service dawng turin Serchhip SP, Pu Lalringdika leh Vaivakawn Polcie Station-a Officer Incharge, Inspector Pu PB Singha bakah Fire Service Medal for Meritorious Service dawng turin Fire & Emergency Services Department-a Driver Special Grade, Pu Lalrinmawia thlan an nih tih puan a ni.

Lammuala Independence Day lawmna zawh a nih hnu hian Larsap, Pu Kummanam Rajasekharan chuan a chenna Raj Bhavan-ah sawm bikte tan thungpui ruai a buatsaih a, Chief Minister Pu Lal Thanhawla, Chief Minister hlui Pu Zoramthanga, BJP President, Prof. JV Hluna, ZPM Chief Ministerial Candidate, Pu Lalduhoma, Minister, MLA, Sorkar Official leh thuthar thehdarhtute an tel a ni.

Lunglei-ah chuan Independence Day hi |huamluaia mual-ah hman a ni a. A hmanpuitu Transport Minister, Pu John Rotluangliana’n hnam puanzar pawtparhin, Parade Contingent 24-te chibai buk a chhang let a; inpumkhatna rilru pua hmasawn zel tura lung rual taka rilru siam\hat a pawimawh tih sawiin, New India, 2022 hmathlir tipuitling tura \an la turin mipuite a sawm a ni. Pu John Rotluangliana chuan hmasawnna tura mamawh hmasa kawlphetha, inkalpawhna kawngpui leh inbiakpawhna lam tihmasawn turin Mizoram Sorkar chuan NEDP hnuaiah kum 2016–19 chhunga hman turin cheng vbc 2,000 a dah niin a sawi a. Mizoram PWD Vision, 2030 ah kum 2030 ral hmaa Mizorama PWD enkawl lei hlui, temporary bridge-te chu permanent bridge a thlak vek tum a nih thu a sawi. Lungleia Independecne Day lawmnaah hian he ni puala Badminton, Basketball, Snooker & Billiards, Tennis, Carrom Board, Table Tennis, Karate leh Football intihsiaknaa ti\hate hnenah Transport Minister chuan lawmman a sem a. Hemi hnu hian District Bawrhsapin sawm bikte tan Lunglei Government College Multipurpose Hall-ah thingpui ruai a buatsaih sak a ni.

Siaha-ah pawh Independence Day vawi 72-na hi Education Minister, Pu H. Rohluna hovin Siaha District Playground-ah lawm a ni a. Mizoram Sorkar Flagship Programme, NLUP chuan ei leh bar zawnna kawngah chhungkaw tam tak hmasawnna a thlen chho mek zel nia sawiin, eizawnna ngelnghet leh rintlak a siam bakah tlangram lo neih pawh a tlak hniam phah niin a sawi. Education Minister chuan, zirna tih hmasawn chu sorkar-in a ngaipawimawh tih sawiin, hmun hrang hranga School leh Department Building sak nan SPA, SCA, NEDP, NABARD leh hmun dang a\angin cheng vaibelchhe \hahnem tak hmuh a ni tawh a, DIET 6-ah Institutional Building thar sak zawh tawh niin, Siaha-ah pawh DIET Institutional Building thar cheng vbh. 2 chuang senga sak chu naktukah hawn ni dawn tih a sawi. Siahaa Independence Day lawmnaah hian Parade Contingents 15 an awm a, heta ti\hate hnenah hian khuallian chuan lawmman a sem a. Hemi hnu hian MADC-a Chief Executive Member-in sawm bikte pualin a Bungalow-ah thingpui ruai a buatsaih a ni.

Lawngtlaia Independence Day lawmna chu AH & Vety Minister, Pu C. Ngunlianchunga’n a hmanpui a. Mizorama Medical College hmasa ber, MIMER hawn a ni ta chuan Mizoram chanchina bung thar kaina pawimawh tak a ni tih a sawi. Pu C. Ngunlianchunga chuan Lawngtlai CYLA Playground-a phullem phah chu hawn theiha peih fel a nih tawh thu a sawi a. LADC Sorkar hnuaia Rural Development Department kaltlangin CEM Rural Housing Scheme hnuaiah chhungkaw 125 hnenah insak \anpuina Rs. 50,000 \heuh leh chhungkaw 130 hnenah rangva bundle 4 \heuh pek an nih thu te, NLCPR a\angin Primary school building 10 leh Middle school building 7 sak a ni a, Lai House Annexe building leh Lai Students’ Hostel sak a nih thu leh PHE in tuizem a sem thu te a sawi a ni. Pu C. Ngunlianchunga hian Parade Contingnent ti\hate hnenah lawmman a sem a, Independence Day puala Football leh Badminton Tournament-a tih \hate hnenah lawmman a sem bawk.

Serchhip-ah chuan Khawtetlang Field-a Independence Day lawmna chu Cooperation Minister, Pi Vanlalawmpuii Chawngthu-in a hmanpui a. India-in zalenna a neih chu Mizoram pawhin a zar zovin chak takin hma a sawn chho zel a, tunah chuan Mizoram hi India-a mipui sum lakluh pun chakna ber pawla ni ta hial niin a sawi. Khuallian thusawi a\anga a lan danin, kumin hian Serchhip District chhungah naupiang 1,046 an awm tawh a, chung zinga 17 chu an pian hnuah an thi a, naupiang zawng zawng a\anga thi zat, Infant Mortality Rate chu 16.3 niin, nu nau chunga thu erawh an awm lo a ni. Serchhipa Independence Day lawmnaah hian Pi Vanlalawmpuii Chawngthu chuan parade contingent ti\hate hnenah lawmman a sem a, hemi hnu hian District Bawrhsap-in sawm bikte tan thingpui ruai a buatsaih a ni.

Champhai Chhangphut Field-a Independence Day vawi 72-na lawmna inkhawm chu PHE Minister, Pu Zodintluanga’n a hmanpui a. Aizawl leh Champhai inkar kawngpui chu double lane a siam a nih dawn bakah Keilungliah Recreation Centre siam tura chak taka hmalak a nih thu a sawi. |halaite tana khawvel thar siam tura sorkar-in hma a laknaah District hrang hrangah phullem phah a ni tawh a, Champhai-ah pawh Vanlallawma Indoor Stadium te, Chhangphut Field leh Zotlangah Stadium puitling siam a ni tawh tih Sports Minister chuan a sawi a. Sorkar-in infiammite tan hmanrua leh hmun hma \ha a chhawpchhuah sak zarah hmasawnna hmuh chhoh zel a ni a, tun hnaia Women’s Hockey World Cup khelh zawh takah khan Thenzawl Womens Hockey Academy a\anga inzirchhuak Kolasib nula, Lalremsiami’n India aiawhin goal a khung a, Government Complex tlangval Jeremy Lalrinnunga pawh Youth Olympic Games-ah weighlifting inelnaa India aiawha turin a inhlangkai niin a sawi. Champhaia Independence Day lawmnaah hian Pu Zodintluanga chuan parade contingent 18-te chibai bukna a chhanglet a, he ni puala buatsaih U-11 Boys & Girls Badminton Tournament-a ti\hate hnenah lawmman a sem bawk.

Kolasib-ah chuan Independence Day vawi 72-na hi Kolasib Sports Stadium-ah Assembly Speaker, Pu Hiphei-a’n a hmanpui a. Mizoram chu ram \ha leh duhawm tak a ni tih sawiin, tun dinhmunah phei chuan India-a state ralmuang ber a ni hial a, khaw lum leh vawt lutuk avangin harsatna a thleng ngai lova, a ram leilung chu thei leh thlai chi hrang hrangin an ngeih em em bawk a. Hetianga ram duhawm ni chunga mipuite rethei taka an awm khaichhuak turin Mizoram sorkar chuan NLUP a duang a, sawiselna tam tak karah a hlawhtlinna hmuh chhoh mek zel niin, NLUP hmanga eizawnna nghet nei leh mahni kut kea ding ta an awm nual tawh niin a sawi. Pu Hiphei hian parade contingent-te chibai a chhanglet a, a ti\hate hnenah lawmman a sem nghal bawk.

Mamit-ah pawh Independence Day vawi 72-na hi Mamit GSA Playground-ah hman a ni a. A hmanpuitu Finance Minister, Pu Lalsawta chuan, NLUP hmangin mi harsa zawkte’n leirem an rah theihna nan \anpuina pek a nih thu leh hemi pui tur hian NEDP hmang thlawp mek a nih thu a sawi a. Kuthnathawktuten thlai thar tam zawk an thar chhuah theih nan Agriculture link road km 57 laih zawh tawh a ni. PMGSY hnuaiah Mamit leh Phaizau inkar kawng kilometre 5.150 a thui pawh laih zawh tawh a ni a. District chhung inkalpawhna kawngpui hrang hrangte siam \hat a, tihchangtlun chhoh mek a ni tih a sawi. Law Minister ni bawk, Pu Lalsawta chuan zu khuahkhirhna dan thar, MLPC Act hnuaiah thubuai 29 ziahluh tawh niin, mi 35 man an ni tawh niin a sawi a. District Court hnuaiah nikum August a\anga kumin July ni 26 chhung khan Criminal Case 453 ziah luh a ni a. Chung zinga Case 351 chu chinfel tawh a ni tih a sawi. Mamit-a Independence Day lawmnaah hian khuallian chuan Parade Contigents 17 te hnam puanzar chibai buk a chhang let a, heta ti\hate hnenah lawmman a sem bakah Mamit District Hospital-a damlote, Home hrang hrang leh District Jail tlawhin thilpek a hlan a ni.

Kolasiba Independence Day lawmna hmanpuitu Assembly Speaker, Pu Hiphei-a’n vawiin khan Kolasib District Hospital, District Jail leh Vengthara Boys Orphanage Home-te tlawhin thilpek a hlan a. Jail tangte chu sual bik ta riaua inngai mai lovin, an thil tih sual palh-ahte insiam\hat tum turin a fuih a ni. Pu Hiphei hian Prisoner Welfare Fund atan cheng 10,000 hlanin, Jail tangte hman turin Guitar leh Volleyball 3 chu a pe a. District Hospital poor Fund-ah cheng 10,000 leh Enna in, Orphanage Home-ah cheng 10,000 a pe a, Kolasib District Football Association hnenah cheng 5000 a pe bawk. Vawiina Assembly Speaker, Pu Hiphei-a’n heng hmun hrang hrang a tlawhnaah hian Bawrhsap, Dr. Arun T, SP Pu Abhisek Dhania leh Officer dangten an \awiawm a ni.

Sangau-ah pawh Independence Day vawi 72-na hi Sangau-IV playground-ah ropui taka lawm a ni a, a hmanpuitu

Lawngtlai East bialtu MLA Pu H.Zothangliana chuan hnam puanzar pawtpharh in Assam Rifles leh zirlaiten India hnam puanzar zahna chibai an buk chu a chhang let a ni.

Parade contingent 12 atangin school naupang 256 ten march pass an nei a, Assam Rifles Sangau te pawhin Salamishastra (Hnam puan zar zahna chibai bukna) an hlan bawk.

Hemi hnu hian Bialtu MLA Pu H.Zothangliana chuan Sangau-III Community Hall-ah SRLM (State Rural Livelihood Mizoram) Sangau Block project hnuaia din Self Help Group Village Organisation 8 te hnenah Sorkar hmalakna a, a thlawna an dawn tur Laptop 8 a sem bawk.

Govt. Complex-a Gauhati High Court Aizawl Bench pawhin Independence day vawi 72-na chu tukin khan an hmang a. Zing dar 7:50-ah hnam puanzar pawt pharin, 225 Bn.CRPF in zahna chibai, Guard of Honour an hlan a ni. Justice Michael Zothankhuma chuan, nikum leh kumin India Independence Day inkara thubuai 496 lutah 495 tih fel a nih thu a sawi a, District hrang hrangah thubuai tihkhawtlai, pending case 6,590 a awm thu sawiin, New Secretariat Complex-a High Court building thar sak mek chu chak taka hnathawh a nih thu a sawi.

Gauhati High Court, Aizawl Bench-in Indepencdence Day an lawmnaah hian Mizoram Bar Association member-te pawh an tel a, an President Pu C. Lalramzauva pawhin thu a sawi a ni.

Independence Day hi Mizoram University-ah pawh tukin dar 8 khan MZU Campus Administrative Building kawtah hman a ni a. Hetah hian MZU Vice-Chancellor, Prof. KRS Sambasiva Rao chuan, hnam puanzar a pawt pharh a. Ram zalenna ni champha chuan mipuite rilruah ram hmangaih a tul zia tuh thar se a duh thu sawiin, Mizoram University hmasawnna tur leh hmachhawp hrang hrang a tarlang bawk. MZU a Independecne Day lawmnaah hian thawktute leh an chhungte an tel a, hetah hian MZU a zirtirtu leh zirlai zinga Library hmang \ha ber hnenah
Best Library User Award 2017-18 hlan a ni a. MZU Security Guard, Ramhlunmawia hnenah hnathawk \ha lawmman hlan a ni bawk.

Ngopaah pawh tukin dar 7 khan Ngopa Public Playground-ah ram zalenna champha vawi 72-na hi lawm a ni a. A hmanpuitu ZOHANCO Chairman, Pu R.Vanlalvena MLA chuan, hnam puanzar pawtpharhin Parade chibai a chhang let a. Independence Day puala intihsiakna hrang hrang a ti\hate hnenah lawmman a sem bawk.

Saituala Independence Day hmanpui tura ruat Pu Chalrosanga MLA chu venhimna chungchangah Saitual Civil SDO Pu R. Vanlalsawma’n kal lo tura a ngen angin a kal lova. Pu Chalrosanga hi Saitual District Implementing Demand Committee-in kal lo turin an ngen a, hemi chungchangah hian dan leh thupek kenkawh kawngah harsatna a thlen loh nan Civil SDO chuan Pu Chalrosanga chu kal lo mai turin a ngen a, hemi ang hian a kal ta lo a ni. Saitual-a Independence day hmanpuitu tur hi kal lo mah se, tukin dar 7:30 khan SDO Civil Pisa tualah he ni hi hman tho a ni a. Hetah hian Civil SDO Pu R. Vanlalsawma’n hnam puanzar a pawt pharh a ni.