Ramhlun South Veng mi, Pu Hmingchungnunga leh a nupui, Pi Roziki chu tukin khan Kawrthah rama an kuhva huana thlamah thi-a hmuh an ni

0
304
views

Aizawla Ramhlun South Veng mi, Pu Hmingchungnunga, kum 62 mi leh a nupui, Pi Roziki, kum 55 mi chu tukin khan Kawrthah rama an kuhva huana thlamah thi-a hmuh an ni. Kawrthah Police hotute hnen a\anga thu dawn danin, an ruang hi Tumpanglui khaw mi, Bru ram kalten vawiin chawhma khan an thlamah an hmu a, hemi hnu hian an khua, Tumpangluia let lehin an khaw VCP an hriattir a, VCP chuan Kawrthah Police hotute a hrilh leh a, chumi hnu chuan a hmuna kalin an ruang hi an hlawm ta a ni. Police-te chuan Pu Hmingchungnunga te nupa thih dan hi chik taka enin anmahni kut thlaktute sulhnu awm thei ang ang pawh an la nghal a ni. Pu Hmingchungnunga leh a nupui, Pi Roziki hian hliam na tak an tuar ve ve a, Pu Hmingchungnunga hi a lu-ah leh a nghawngah hmanraw hriam hmanga kut thlakna hnuhma ni awm hmuh a ni a, Pi Roziki pawh hi a nghawng, a lu leh a kutah te na taka kut thlakna hnuhma hmuh a ni. An ruang hi vawiin chawhnu khan Kawrthah Damdawi In thlenpui a ni a, Doctor-ten an endik nghal a ni. Thil tihfel ngaite tihfel hnuah an ruang hi an awmna hmun Ramhlun South panpui an ni ang. Pu Hmingchungnunga leh a nupui, Pi Roziki hi Kawrthah khaw chhim lam, km 2 vela hlaa an kuhva huan samin an riak a, anmahni chunga kut thlaktute hi nimin emaw, nizanah emaw an che nia rin a ni. Anmahni thattute thil tum hi hriat theih a la ni rih lova, Police-te chuan Kawrthah Police Station-ah tualthah thubuai ziak lutin an chhui zui dawn a ni. Pu Hmingchungnunga leh Pi Roziki hian fapa pakhat, fanu pahnih leh an tute pahnih an kalsan a ni.