Ration Card leh Aadhar Card thlunzawm loh vangin tumah harsatna siam sak lo turin FCS&CA hotuten ti

0
1312
views

Ration Card leh Aadhar Card thlunzawm loh vangin Ration card nei tumah harsatna siamsak tur an ni lo tih Food Civil Supplies and Consumer Affairs Dept hotuten Zonet an hrilh. Ration Card leh Aadhaar Card thlunzawm hna an thawh chhoh mekah Ration Card leh Aadhar Card thlunzawm loh avanga Ration lak tir loh emaw, harsatna siamsak emaw an tum loh thu Dept hotute chuan an sawi a, Ration Card nei tawh phawt chuan Aadhar nen la thlunzawm lo mahse an chanpual an la ngei tur a ni an ti. Food, Civil Supplies & Consumer Affairs Department hian January thla tawp thleng khan Family Ration Card leh Aadhar Card 194671 an thlunzawm tawh. DCSO Aizawl West huam chhungah Ration card leh Aadhaar card thlunzawm tawh hi za zela chhutin a sang ber a, Ration card 46988 awmah 42368 thlunzawm a ni tawh a, hei hi zaa 90 a tling a ni. Champhai DCSO huam chhungah ration card 30604 zinga 22202 thlunzawm a ni tawh a, hei hi zaa 41 a ni a, hmabak an la ngah ber thung. Aizawl East huam chhungah ration card awm zawng zawng atanga zaa 87 chu aadhaar card nena thlunzawm a ni tawh a, Kolasib DCSO huam chhungah zaa 79, Lawngtlai DCSO huam chhungah zaa 51, Lunglei DCSO huam chhungah zaa 47, Mamit DCSO hnuaiah zaa 63, Siaha DCSO huam chhungah zaa 62 leh Serchhip DCSO huam chhungah zaa 86 te thlunzawm a ni tawh bawk. Food Civil Supplies & Consumer Affairs Department hotute chuan, Ration Card awm zat hi thla tin a danglam niin an sawi a, hei hi a chhan chu chhungkaw pakhat atanga indang thar, Card thar siam an awm reng vang te, Card dik lo thenkhat paih a awm thin vang te a ni an ti.