Rela buhfai phurh lak chhuahna kawng, Rengtekawn leh Bairabi inkar kawng chu PWD, Kolasib Highway Division-in ngawrh takin a siam zel nia thu dawn a ni a, kar lehah chuan tluang taka motor tlan theiha siam theih an beisei. PWD hotute hnen atanga thu dawn danin kawng khuar leh bumboh zual laite hi Silchar atang leh Kolasib District-a quarry hrang hrang atanga lung lak hmanga hnawh a ni a, a chhiat zualna lai chu Zero point leh Rengtekawn inkara State Highway km 6 vela thui a ni a, helaiah hian hmun li nga vela kawng chhe zual laiah beihpui thlak mek a ni. A hmunah SDO leh JE ten awm chilhin khawl nen hna an thawk a, naktuk, Pathianni-ah pawh chawl lovin an thawk dawn a ni. PWD hotute chuan Rengtekawn leh Bairabi inkar, State Highway chinah leh National Highway chinah pawh a ram leilung hi a nem hrim hrim avangin kawnga lung phah tum thum lai chil pil a ni tawh a, tunah phah that leh mek a ni a, fur ruahtui tlain kawng a chiah hnua motor lian, quintal 400 chuanga rit phurin he kawng hi a zawh reng si avangin kawng chhuata lung phah a pil thuai a, chak takin kawng a chhe thin niin an sawi.
