Rokung Memorial Society buatsaih Rokunga Award, 2018 chu Lunglei District-a Lunglawn khaw mi, Pu R. Zaikunga hnenah pek a ni

0
508
views

Chawimawina hlanna inkhawm Synod Conference Hall-a neihah Rokunga Award, 2018 Selection Committee Chairman, Prof. R. Lalthantluanga leh Rokung Memorial Society Chairman, Pu Lalfakzuala’n he chawimawina hi Pu R. Zaikunga hnenah an hlan a ni. He chawimawina dawngtu, Pu R. Zaikunga hi kum 1953 January thlaah Lunglei District-a Tarpho khuaah a piang a, kum 1963-ah tuna an chenna Lunglawnah a pem a, zirna lamah chuan Pu R. Zaikunga hi pawl 10 pass a ni a, Primary School-ah zirtirtu hna a thawk \hin a ni. Khawtlangah chhiat tawk an awmin a thleng hmasa pawl a ni ziah a, tlangval a nih lai a\anga kum 2015 thleng khan a dam a nih chuan mitthi lumennaah a kal ziah \hin a, thlan pawh kumin thleng hian a la lai ziah \hin a, khawhar inah pawh a riak ziah a ni.

He chawimawina buatsaih a nih chhan sawifiahtu, Rokung Memorial Society Treasurer, Pu Vanneihtluanga chuan, \hangthar zel zingah Mizo nunze mawi chawinun a nih theih nana tih a nih thu a sawi a, hemi buaipui tur hian YMA chu phungbawmah sawmin, chawimawi tlak nia hriat mi 12 hming an hnen a\angin dawn a ni a, hei hi dik taka tih a nih theih nan a thlangtu zingah Society-a tel ve lova, mi 4 leh Society aiawh 1 ruat an ni tih a sawi. Pu Vanneihtluanga chuan, hetiang chawimawina buatsaih hi an inthlahrung hle a, \ul nia an hriat bawk si avangin tun dinhmun hi an thleng ta tih a sawi a, he chawimawina hi kum 3 dan zela hlan \hin tura ruahman a nih thu leh a dawng tlak hi Mizo zingah a tam thei ang ber awm se tih chu Rokunga Memorial Society duhdan a nih thu a sawi. Rokunga Award 2018 Selection Committee-a Member Secretary, Pu CH Thangkhuma pawhin he chawimawina dawng tura Pu R. Zaikunga thlan a nih dan a sawifiah a. Rokunga Memorial Society Secretary, Pu Rochamliana’n chawimawina dawngtu, Pu R. Zaikunga chanchin leh he chawimawina pek a nih chhan a sawifiah bawk. He chawimawina hian thuziak, tangkapui leh pawisafai cheng sing 5 a keng tel a, heng lawmmante hi Vanglaini nitin chanchinbu-in a tum sak a ni.