Ratu Higher Secondary School Building sak thar vawiina a hawn paha thu sawiin Education Minister hian mumal zawka zirna kalpui tura sorkarin hma a lak meknaah, Zirna quality siam that nan hun reiloteah Middle School Leaving Certificate Examination siam thar leh tum a ni a, school inspection pawh mumal zawka kalpui anih theih nan ruahmanna siam a ni a ti.
Pu Lalchhandama Ralte hian khawtlangah zirnain hmun sang a channa hmunah chuan zirna quality a tha thin a ti a. Zirna hmunte chu khawtlang hruaitute leh nu leh paten vil ngunpui a pawimawh a, zirna chu sorkar kutah ringawt dah chi a ni lo a, mipuite nen tanrual a tul a ni a ti.
School Education Director Pu James Lalrinchhana pawhin thu sawiinm hri leng leng mek avanga school hawn theih loh chhungin pawl 1 atanga pawl 12 zirlaite tan SCERT leh MBSE ten hapta tina an tih tur an duang tih a sawi a, hengte hi school hawn theih hunah zirlaite bukna chikhatah hman a nih dawn tih a sawi.
Ratu Higher Secondary School hi Lump sum Grant in aid hmanga enkawl a ni a, building thar hawn tak hi office leh Class room pahnih a ni a, cheng nuai 28 leh sang 5,869/- senga sak a ni. Building thar hawnna inkhawmah hian Sinlung hills council chairman Pu Malsawma Darngawn pawh a tel a ni.
