Doctor of Divinity dawng tura thlan anih thu hi Ningani khan lehkha in Pu Lal Thanhawla hi hriattir a ni. Mizoram Pradesh Congress Committee MPCC chuan India rama Pathian thu zirna hlun ber, Theological College hrang hrangte pawhin affiliation an tihna \hin, Mizorama Kohhran hrang hrangte nena inzawm nghet tak Serampore College (University)-in an president Pu Lal Thanhawla Doctor of Divinity a hlan tur hi ropui an tih thu leh lawmawm an tih thu an sawi a, Serampore College-in an lehkhaa an tarlan danin Pu Lal Thanhawla hi Kohhran leh khawtlang tana a thawhhlawk vanga chawimawina sang Doctor of Divinity (DD) hi hlan tur a ni an ti a.
Chawimawina hi November 30, 2019-a Hyderabad khawpuia Serampore College (University) Convocation-ah hlan a ni dawn tih an sawi.
MPCC chuan Pu Lal Thanhawla hi India ram, Hindu kulmuk tamna ramah ram hruaitu lawkte zingah pawh Kristian te hruaitu anga hriat \hin a ni an ti a. India rama Kristian tlemte awmte tan a chhuanawmin, a thlamuanpuiawm hle \hin a ni an ti a, India ram hmun hrang hrangah Kohhran leh Institution hrang hrangten an hun pawimawhah an sawm fo a, Pu Lal Thanhawla hian a theihna apiangah a telpui \hin a ni an ti.
MPCC chuan hetianga Chief Minister anih laia Pu Lal Thanhawla’n hma a lak \hinna avang hian sakhaw dang kara Kristian tlemte awmten ngaihpawimawh an hlawh phah \hin a, Mizo Kristiante chawimawitu langsar tak a ni an ti a. India ram hmun hrang hranga Kristian-ten tihduhdahna an tawh changin Pu Lal Thanhawla hian Kristiante thlavang hauhin na takin a tawngchhuak \hin a, chu chuan awmzia a neiin, tihduhdah tuar mekten an thlamuanpui \hin hle a ni an ti.
Pu Lal Thanhawla hi term 5 Chief Minister lo ni tawh a ni. Politics lama Kristian hruaitu langsar tak, Nagaland Chief Minister hlui, a hnu lama state hrang hranga Governor ni zui ta, SC Jamir pawh kha kum 2007 khan Doctor of Divinity (DD) hi Serampore College hian a lo hlan tawh tih MPCC chuan an sawi.
