Serchhip-Thenzawl-Buarpui kawng, Intermediate road atana laih zau mek chu Sailiamkawn atanga km 1 velah nizan khan lei minin a hnawh ping a, vawiin khan Tantia Construction Company-in lirthei chi tin kal theihin an siam tlang leh a ni. Serchhipa kan Corr. sawi danin he kawng hi intermediate lane atana Asian Development Bank atanga sum puk hmanga laih mek a ni a, kawng thar a nih avangin ruah a sur chuan lei a min fo a ni.
Aizawl-Thenzawl-Lunglei World Bank kawng erawh chu a la tlang zel a, Hmuifang khama nimina kawng ping leh Sateek bula Sakei zuanthlakna khama lei min thin avanga harsatna chu vawiin lamah motor veivak tibuai khawpin a awm lo ni a thu dawn a ni. Khawhminglokawn atanga Changte lui lam atanga Sialsuk panna kawng, tun hnaia lei minin a hnawh pawh siam tlang leh tawh niin PWD hotute chuan an sawi.
